Буюк Британияда Россия билан дипломатик алоқаларни узиш учун ҳеч қандай сабаб йўқ. Бу ҳақда 7 март куни Россиянинг Буюк Британиядаги элчиси Андрей Келин “ТАСС” нашрига маълум қилган.
“Бундай радикал қадам учун асос йўқ. Мамлакатларимиз уруш ҳолатида эмас. Лондоннинг ўзи ҳам дипломатик каналлар ва элчихоналар очиқ бўлишидан манфаатдор эканини таъкидлаб келади. Шу боисдан ҳам бундай чақириқлар одатдагидек лаёқатсиз сиёсатчилар томонидан эълон қилинади. Бундай чақириқлардан мақсад Россияга қарши сиёсий кураш майдонида балл ишлаш”, — деган Буюк Британияда вазифасини бажарувчи россиялик дипломат.
Хабарга кўра, Россия билан муносабатларни узиш ёки қайта кўриб чиқиш айни дамда Британия парламентида кун тартибидаги масалалардан бири. Ушбу борадаги муҳокамалар Владимир Путиннинг мухолифи Алексей Навальний вафот этиши ортидан яна кучайди. Британия Парламенти депутатларидан айримлари икки томон ўртасидаги муносабатларни музлатиш учун элчихоналарни ёпишни ҳам таклиф этгани айтилган.
Бирлашган қироллик парламенти депутати, консерватор Тобиас Эллвуд Россия билан дипломатик каналларни нисбатан очиқ қолдирган ҳолда, рус элчисини Буюк Британиядан чиқариб юборишни таклиф қилган.
Изоҳ (0)