Ijtimoiy tarmoqlarda usta-quruvchilar Buxoro ixtisoslashtirilgan sanʼat maktabidagi musiqa asbobi (pianino)ning ustiga chiqib, jamoatchilikning eʼtirozlariga sabab bo‘luvchi xatti-harakatlarni sodir etgani haqida xabarlar tarqaldi. Holat yuzasidan Buxoro viloyati madaniyat boshqarmasi munosabat bildirdi.
Maʼlum qilinishicha, tarmoqlarda tarqalgan maʼlumotlar yolg‘on va haqiqatga to‘g‘ri kelmaydi.
“ ‘Boqiy Buxoroʼ tarixiy-etnografik parki qurilishi munosabati bilan loyiha amalga oshirilishi rejalashtirilgan hududdagi Buxoro ixtisoslashtirilgan sanʼat maktabi barcha jihozlari, shu jumladan, barcha musiqa asboblari bilan boshqa binoga ko‘chirilgan. Buxorodagi qurilish ishlariga jalb etilgan usta-quruvchilar esa video aks ettirilgandagi maxsus kiyim-boshda bo‘lmagan”, — deyiladi munosabatda.
Madaniyat vazirligi matbuot xizmatining maʼlum qilishicha, Buxoro ixtisoslashtirilgan sanʼat maktabining Buxoro shahar, Hofiz Tanish Buxoriy ko‘chasi 1-uyda joylashgan binosi mazkur hudud Buxoro shahar turizm markaziga aylantirilayotgani munosabati bilan buziladigan binolar ro‘yxatiga kiritilgan.
“Viloyat hokimligi bu borada vazirlikni ogohlantirgan, maktab vaqtincha Buxoro shahar kasb-hunar maktabining yotoqxonasi va o‘quv binosining 2 ta qavatida faoliyat olib borishi belgilangan. Nafaqat ixtisoslashtirilgan sanʼat maktabi, balki shu hududda joylashgan bir qator davlat idora va tashkilotlari ham boshqa hududlarga ko‘chirilgan”, — deyiladi xabarda.
Taʼkidlanishicha, kelgusida Buxoro ixtisoslashtirilgan sanʼat maktabi uchun zamon talablariga mos yangi o‘quv binolari, yotoqxona hamda konsert zali qurib berilishi rejalashtirilgan.
Izoh (0)