O‘zbekistonda eng kamida 69 nafar bolaning o‘limi va 16 nafar bolaning nogiron bo‘lib qolishiga olib kelgan “Dok-1 Maks” siropi bo‘yicha 23 nafar sudlanuvchiga hukm o‘qilgani haqida xabar berilgandi. Sudda aytilishicha, ularning 7 nafari ozodlikdan mahrum qilingan, 14 nafarining ozodligi cheklangan. Bir nafari axloq tuzatish va yana bir nafari jarimaga tortilgandi. Sudyaning yakuniy xulosasida bildirilishicha, “Dok-1 Maks” fojiasini ko‘rib chiqqan sudda advokatlar savolidan omon qolib, suvdan quruq chiqqan yana bir sobiq mansabdorga va bir necha shifokorlarga jinoiy ish ochilishi mumkin.
Shu bilan birgalikda, Jinoyat-protsessual kodeksining 417-moddasi tartibida xabarnoma yuborish haqida ham qarorga kelindi. Jumladan, Farmatsevtika tarmog‘ini rivojlantirish agentligining direktori o‘rinbosari lavozimida ishlagan Ulug‘bek Egamovga, shuningdek, Olmaliq shahar bolalar shifoxonasi lor-shifokori Abror Islomovga, Qiziriq tuman tibbiyot birlashmasi bolalar bo‘limi shifokori Elyor Bobomurodovga, Qiziriq tuman ko‘p tarmoqli shifoxonasining bolalar bo‘limida ishlovchi Xurshid ismli shifokorga, Zarafshon shahridagi tibbiyot birlashmasida marhum Damir Shokirovga qaragan shifokorlarga nisbatan jinoyat ishi qo‘zg‘atish haqida tergov organiga xabarnoma yuborish bo‘yicha to‘xtamga kelindi, — deydi “Dok-1 Maks” aybdorlariga hukm o‘qigan sudya Muso Yusupov.
Ulug‘bek Egamov kim? Uning “Dok-1 Maks” ishiga qanday aloqasi bor?
Ulug‘bek Egamov rasmiy tayinlov sabab 2022-yilning 12-aprel kuni tarmoqlarda ko‘rinish berib, Farmatsevtika tarmog‘ini rivojlantirish agentligi direktorining birinchi o‘rinbosari sifatida jamoatchilikka tanilgandi. Ko‘p o‘tmay, aniqrog‘i, 2023-yilning 20-fevralida “Dok-1 Maks” ishida ayblanib, qamoqqa olingan agentlik direktori Sardor Kariyev o‘rnida ish boshladi.
“Dok-1 Maks” sudining 2023-yil 15-noyabr kuni bo‘lib o‘tgan majlisida u guvoh sifatida tergov qilindi. Sudda sirop ishi bo‘yicha aybdor deb topilgan Sardor Kariyev aslida uning o‘rnida Ulug‘bek Egamov bo‘lishi kerakligini, sirop ishi bo‘yicha asosiy aybdor u ekanini aytgandi.
Sen “zam” bo‘lib kelganingdan keyin agentlikda barcha qilg‘iliqlar boshlangan ekan. Men buni tergov paytida bildim, shu paytgacha ko‘zim ko‘r bo‘lib, bilmay yurgan ekanman. Bu “zam” bo‘lib, yaxshi ishlayapti, deb yurgan ekanman. Lekin seni deb men hozir shu yerda o‘tiribman, — degandi Sardor Kariyev.
Sardor Kariyev, shuningdek, tergov paytida u Hindistonning “Kuraraks” dorisini (33 ming dollar pora evaziga inspeksion tekshiruvdan olib tashlangan dori vositasi) inspeksion tekshiruvdan olib tashlash bo‘yicha agentlikdan topshiriq bo‘lganini, bu ish uning nomidan Ulug‘bek Egamov topshirig‘iga ko‘ra amalga oshirilganini ma’lum qilgandi.
Farmatsevtika tarmog‘ini rivojlantirish agentligining sobiq rahbari Sardor Kariyev sudda guvoh bilan yuzlashar ekan, “Kuraraks” dorisini inspeksion tekshiruvdan olib tashlash bo‘yicha menga murojaat qilganmiding, dedi. Guvoh Ulug‘bek Egamov savolga javoban bu bo‘yicha unga murojaat qilmaganini bildirdi. Shundan so‘ng sudlanuvchi guvohdan dorini inspeksion tekshiruvdan olib tashlash uchun olingan 33 ming dollarning qancha qismi unga tegganini so‘radi. Guvoh bu pullarni ko‘rmaganini ma’lum qildi.
Sen iflosni deb, 11 oydan beri mana shu yerda o‘tiribman. Sud binosidan chiqib ketayotganingda oila a’zolarimning ko‘ziga qarab o‘tib ketgin, — dedi Sardor Kariyev.
Sardor Kariyev sudda Ulug‘bek Egamovning asosiy aybdor ekanini aytgan yagona inson emasdi, o‘sha sud majlisida Kariyevdan tashqari yana 6 nafar sudlanuvchi hamda bir nechta advokatlar Ulug‘bek Egamov sirop voqeasida asosiy aybdor ekanini bildirib, unga qarshi jinoyat ishi ochilishini so‘ragandi. Advokatlar iltimosnoma ham kiritgandi. Biroq bir oylik tanaffusdan qaytgan sud Ulug‘bek Egamovga emas, boshqa shaxslarga qarshi jinoyat ishi ochilganini ma’lum qildi. Yana Ulug‘bek Egamov masalasi ochiq qoldi.
Sud tergovida advokatlar va sudlov hay’ati tomonidan so‘roq qilingan Ulug‘bek Egamov vakolatli vazifada o‘tirgan paytda Sardor Kariyevning nomidan uning o‘rinbosari Amirxon Azimovga hindistonlik ishlab chiqaruvchining yana bir dori vositasi “Kuraraks”ni inspeksion tekshiruvdan olib qolish va aynan shu dori ro‘yxatdan o‘tganini tasdiqlovchi guvohnoma berish kerakligi xususida topshiriq bergani aytildi. Advokatlar mazkur topshiriq Telegram messenjeri orqali berilganini, buni isbotlash uchun ularda skrinshotlar borligini bir necha bor ta’kidladi. Sudlov hay’ati raisi ham bu hujjatdan boxabar ekani ma’lum bo‘ldi. Biroq Egamov masalasi noma’lum sabablarga ko‘ra o‘sha paytda ham yopiq qoldi.
Izoh (0)