Ижтимоий тармоқларда уста-қурувчилар Бухоро ихтисослаштирилган санъат мактабидаги мусиқа асбоби (пианино)нинг устига чиқиб, жамоатчиликнинг эътирозларига сабаб бўлувчи хатти-ҳаракатларни содир этгани ҳақида хабарлар тарқалди. Ҳолат юзасидан Бухоро вилояти маданият бошқармаси муносабат билдирди.
Маълум қилинишича, тармоқларда тарқалган маълумотлар ёлғон ва ҳақиқатга тўғри келмайди.
“ ‘Боқий Бухоро’ тарихий-этнографик парки қурилиши муносабати билан лойиҳа амалга оширилиши режалаштирилган ҳудуддаги Бухоро ихтисослаштирилган санъат мактаби барча жиҳозлари, шу жумладан, барча мусиқа асбоблари билан бошқа бинога кўчирилган. Бухородаги қурилиш ишларига жалб этилган уста-қурувчилар эса видео акс эттирилгандаги махсус кийим-бошда бўлмаган”, — дейилади муносабатда.
Маданият вазирлиги матбуот хизматининг маълум қилишича, Бухоро ихтисослаштирилган санъат мактабининг Бухоро шаҳар, Ҳофиз Таниш Бухорий кўчаси 1-уйда жойлашган биноси мазкур ҳудуд Бухоро шаҳар туризм марказига айлантирилаётгани муносабати билан бузиладиган бинолар рўйхатига киритилган.
“Вилоят ҳокимлиги бу борада вазирликни огоҳлантирган, мактаб вақтинча Бухоро шаҳар касб-ҳунар мактабининг ётоқхонаси ва ўқув биносининг 2 та қаватида фаолият олиб бориши белгиланган. Нафақат ихтисослаштирилган санъат мактаби, балки шу ҳудудда жойлашган бир қатор давлат идора ва ташкилотлари ҳам бошқа ҳудудларга кўчирилган”, — дейилади хабарда.
Таъкидланишича, келгусида Бухоро ихтисослаштирилган санъат мактаби учун замон талабларига мос янги ўқув бинолари, ётоқхона ҳамда концерт зали қуриб берилиши режалаштирилган.
Изоҳ (0)