Ўзбекистон президентининг Афғонистон бўйича махсус вакили Исматулла Иргашев Қатар элчиси Ҳасан Ҳамза Асад Муҳаммад Ҳошим билан учрашув ўтказди. Бу ҳақда “Дунё” агентлиги хабар берди.
Қайд этилишича, томонлар Афғонистон бўйича Ўзбекистон—Қатар ҳамкорлигининг бугунги ҳолатини муҳокама қилган. Бу йўналишда мунтазам мулоқотни давом эттиришдан ўзаро манфаатдорлик таъкидланган.
Суҳбат чоғида 2024 йилнинг февраль ойида Қатар пойтахти Доҳа шаҳрида БМТ бош котиби Антониу Гутерриш раислигида бўлиб ўтадиган Афғонистон бўйича махсус вакилларнинг учрашувига алоҳида эътибор қаратилган.
Ушбу тадбир жаҳон ҳамжамиятининг Афғонистондаги вазиятни барқарорлаштириш бўйича самарали ечимларни таклиф этиш ва ҳаракатларини мувофиқлаштириш, афғон халқига инсонпарварлик ёрдами кўрсатишда муҳим аҳамият касб этиши таъкидланган.
Шавкат Мирзиёев 2023 йил 19 июль куни Марказий Осиё мамлакатлари ва Кўрфаз араб давлатлари ҳамкорлик кенгаши етакчиларининг биринчи саммитида Афғонистонда тинчликка эришиш масалаларига тўхталиб ўтганди.
Бизнинг минтақаларимиз ташаббускор бўлиб, катта-катта минбарлардан Афғонистон муаммоларига бутун дунё эътиборини жалб этишимиз, афғон халқининг ҳаётини енгил қилишга муносиб ҳисса қўшишимиз керак, — деган эди давлат раҳбари.
Изоҳ (0)