O‘zbekiston vazirlari Kobulda: Tashrifdan maqsad nima?

O‘zbekistonning savdo-iqtisodiy delegatsiyasi Kobulga tashrif buyurdi. Bu haqda Tolibon harakatining sanoat va savdo vazirligi xabar berdi.

O‘zbekiston bosh vaziri o‘rinbosari Jamshid Xodjayev delegatsiyaga boshchilik qilmoqda. Tashrifdan maqsad o‘zaro savdoni rivojlantirish, ikki davlat o‘rtasidagi tranzit muammolariga yechim topish va Kobulda O‘zbekiston tovarlari ko‘rgazmasini ochishdan iborat. Delegatsiyani aeroportda “Tolibon” savdo vaziri Nuriddin Aziziy kutib olgan.

Delegatsiya tarkibida O‘zbekiston prezidentining Afg‘oniston bo‘yicha maxsus vakili Ismatulla Irgashev, transport vaziri Ilhom Mahkamov, qishloq xo‘jaligi vaziri Ibrohim Abdurahmonov, energetika vaziri Jo‘rabek Mirzamahmudov va boshqa amaldorlar bor.

Avvalroq 30 kishilik O‘zbekiston delegatsiyasi “Tolibon” rasmiylari bilan muloqot qilish uchun Kobulga borgandi. O‘shanda “Tolibon” o‘zbek rasmiylarining tashrifidan maqsad “Afg‘oniston va O‘zbekiston o‘rtasidagi savdo-iqtisodiy aloqalarni kengaytirish” ekanini bildirgan.