Namangan viloyat sudi Iqtisodiy ishlar bo‘yicha sudlov hayʼati taftish instansiyasining 2024-yil 12-fevraldagi qarori bilan “Namangan xalqaro nodavlat universiteti” MCHJ litsenziyasi bekor qilingani to‘g‘risidagi qaror o‘zgarishsiz qoldirildi. Bu haqda Oliy ta’lim, fan va innovatsiyalar vazirligi xabar berdi.
Qayd etilishicha, ijtimoiy tarmoqlarda Namangan xalqaro universitetining talabalari majburiy tarzda Toshkent kimyo xalqaro universitetiga ko‘chirilayotgani haqida asossiz xabarlar tarqalmoqda.
Oliy taʼlim, fan va innovatsiyalar vazirligi ushbu xabar mutlaqo haqiqatga mos kelmasligini bildirib, litsenziyasi bekor qilingan “NamXU OTM” MCHJning talabalari o‘qishini arizasiga muvofiq belgilangan tartibda oliy taʼlim tashkilotlariga ko‘chirilishi Oliy taʼlim, fan va innovatsiyalar vazirligining Ishchi guruhi tomonidan olib borilayotganini maʼlum qildi. “Jarayon to‘liq nazoratga olingan”, — deyiladi xabarda.
Ta’kidlanishicha, talabalarning o‘qishini ko‘chirish ularning arizalariga ko‘ra tashkil etilmoqda. Biror talaba majburlab boshqa oliygohga ko‘chirilmaydi.
Eslatib o‘tamiz, 2023-yil iyul o‘rtalarida Oliy ta’lim, fan va innovatsiyalar vazirligi At-Termiziy nomidagi xalqaro universitetga oliy ta’lim xizmatlarini ko‘rsatish uchun litsenziya berilmaganini ma’lum qilgandi. “Ta’lim to‘g‘risida”gi qonunning 29-moddasiga asosan, nodavlat ta’lim tashkilotlari litsenziya olingan kundan e’tiboran ta’lim faoliyati bilan shug‘ullanishga haqlidir.
Izoh (0)