Jizzax viloyatida 1-martdan ichimlik va oqova suv xizmatlari bo‘yicha yangi tariflar belgilanadi. Bu haqda “O‘zsuvta’minot” matbuot xizmati xabar berdi.
Ta’kidlanishicha, 14-fevral kuni Xalq deputatlari viloyat kengashi tomonidan ichimlik suvi ta’minoti va oqova suv xizmatlari uchun yangi narxlar tasdiqlangan.
Bunda taklif etilayotgan barcha narxlar QQSsiz hisoblangan.
Qayd etilishicha, keyingi besh yilda viloyatda markazlashgan ichimlik suvi bilan ta’minlanish darajasi 70,4 foizdan 90 foizga, kanalizatsiya qamrovi 15,5 foizdan 71,2 foizga yetkaziladi. Buning uchun 402,1 milliard so‘mga, 878,3 kilometr ichimlik suvi va 461 kilometr kanalizatsiya tarmog‘i, shuningdek, 167 ta suv va 30 ta kanalizatsiya inshootlari qurilishi rejalashtirilgan.
Bundan tashqari ish haqi, elektr-energiya, soliq to‘lovlari, xorijiy kreditlar to‘lovi amalga oshirilgan bo‘lib, joriy va kapital ta’mirlash, tizimni modernizatsiya qilish ishlarida ham sarf-xarajatlar talab etiladi, — deyiladi xabarda.
Bundan avval Qoraqalpog‘iston Respublikasi, Sirdaryo, Farg‘ona, Samarqand, Xorazm, Andijon, Qashqadaryo, Surxondaryo va Toshkent viloyatida ichimlik suvi va oqova xizmatlar bo‘yicha yangi tariflar tasdiqlangandi.
Izoh (0)