Andijon, Toshkent, Sirdaryo viloyatlari hamda Toshkent shahrida yer maydonlari va savdo do‘konini sotish bilan bog‘liq firibgarlik holatlari fosh etildi, deb xabar beradi Bosh prokuratura huzuridagi departament.
Ma’lum qilinishicha, departamentning Andijon tuman bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbirda fuqaro J.M. o‘ziga tadbirkorlik faoliyatini amalga oshirish uchun ajratilgan yer maydonining 15 sotixini fuqaro G.Z.ga 21 ming dollar evaziga tanishlari yordamida noturar joy sifatida kadastr hujjatlarini tayyorlab berishini aytib, oldindan 15 ming dollarni olgan vaqtida ashyoviy dalillar bilan ushlangan.
Shu kabi departamentning Chilonzor tuman bo‘limi tomonidan o‘tkazilgan tezkor tadbirda fuqarolar M.Y. va B.S. ijara shartnomasi asosida foydalanib kelgan Chilonzor dehqon bozori balansidagi do‘konni fuqaro T.Y.ga firibgarlik yo‘li bilan 4 ming dollarga sotishga kelishib, shundan 2 ming dollarni olgan vaqtida ashyoviy dalillar bilan ushlangan.
Departamentning Piskent tuman bo‘limi va Toshkent viloyati IIBB xodimlari hamkorligida o‘tkazilgan tezkor tadbirda fuqaro M.O. “Lolaariq” MFYda joylashgan bog‘dorchilik va uzumchilik shirkatiga qarashli 6 sotix yer maydonini fuqaro M.Sh.ga 3,5 ming dollarga sotishga kelishib, shundan 1,5 ming dollarni olgan vaqtida ashyoviy dalillar bilan ushlangan.
Departament hamda DXXning Sirdaryo tumani bo‘limlari tomonidan o‘tkazilgan tezkor tadbirda fuqaro A.X. Davlat kadastrlar palatasining tuman filiali yerlarini auksionga chiqarish mutaxassisi A.T. bilan o‘zaro til biriktirib fuqaro Sh.A.ga “Islomobod” mahallasi hududidan o‘tgan M34 avtomobil yo‘li bo‘yida joylashgan 50 kvadrat metr o‘lchamdagi yer maydonini yengil tipdagi savdo do‘koni qurish uchun “E-auksion” elektron savdo platformasiga joylashtirishi va yutib berishi evaziga 900 dollar va 1,2 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi. Aprel boshlarida esa Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgandi.
Izoh (0)