Toshkent shahrida “eski ToshMI” hududidagi sobiq kadet korpusining bosmaxona binosini restavratsiya qilish loyihasi tasdiqlandi. Bu haqda Madaniy meros agentligi xabar berdi.
Yanvar oyining boshida Yashnobod tumanida joylashgan Toshkent tibbiyot akademiyasining ko‘p tarmoqli klinikasi binosi buzilishi haqida xabarlar keng muhokamalarga sabab bo‘lgan edi. Ushbu holatga javoban Madaniy meros agentligi tomonidan berilgan rasmiy bayonotda bino tuzilmasi hamda obyektda olib boriladigan taʼmirlash ishlari haqida qo‘shimcha axborot berilishi maʼlum qilingan.
Qayd etilishicha, 11-yanvar kuni agentlik huzuridagi Ilmiy-ekspert kengashining 1-sonli yig‘ilishi bo‘lib o‘tdi. O‘tkazilgan yig‘ilishda “O‘zshaharsozlik LITI” davlat muassasasi tomonidan taqdim etilgan “Toshkent tibbiyot akademiyasining ko‘p tarmoqli klinikasida bino va inshootlarni qurish, rekonstruksiya qilish” loyihasi ko‘rib chiqilgan.
Loyihaga ko‘ra, ushbu binoga mos ravishda 26 metr, 13 metr va 52 metr masofalardagi “Akkreditatsiya-simulyatsiya” qo‘shimchasiga 2 ta yotoqxona binosini qurish, loyihada cherkov bo‘lgan binoning yuqori qismini tiklash, binolarning tashqi ko‘rinishini hamda konstruktiv holatini saqlash belgilangan.
Agentlik huzuridagi Ilmiy-ekspert kengashi tomonidan “O‘zshaharsozlik LITI” davlat muassasasi tomonidan ishlab chiqilgan Toshkent tibbiyot akademiyasining binosi (sobiq Kadetlar binosi) rekonstruksiya qilish va inshootlarini qurish loyihasi yuqorida belgilangan talablar, shuningdek, binoning tashqi ko‘rinishini konstruktiv tarzda saqlash sharti bilan tasdiqlangan.
Maʼqullangan kengash loyiha xulosasi tegishli tartibda “O‘zshaharsozlik LITI” davlat muassasasiga yuborilgan.
Izoh (0)