Navoiy viloyati Tomdi tumanida yuk avtomashinasini pul evaziga jarima maydonidan chiqartirib berishni vaʼda qilgan shaxs ushlandi, deb xabar beradi Bosh prokuratura huzuridagi departament.
Qayd etilishicha, departamentning Tomdi tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Tadbirda E.M. ismli shaxs (muqaddam sudlangan) fuqaro H.B.ning ishonchiga kirib, unga nisbatan yo‘l harakati qoidalarini buzganlik uchun to‘plangan hujjatlar bo‘yicha go‘yoki IIBda ishlovchi tanishlari yordamida uning foydasiga qaror qabul qilib berishni va’da qilgan. U yuk avtomashinasini va temir quvurlarini jarima maydonidan chiqartirib berishi evaziga 1,5 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Farg‘onada savdo do‘koni yonidan bo‘sh yer olib berish uchun 8 ming dollar so‘ragan shaxs ushlangani, Andijonda 5 mlrd so‘m imtiyozli kredit olib berish uchun 22 ming dollar olgan shaxslar qo‘lga olingani, Samarqandda 10 ming dollarga fuqaroni qamoqdan chiqarib berishni va’da qilgan shaxs ushlangani to‘g‘risida xabar berilgandi.
Izoh (0)