Samarqandda kiberjinoyatchilar bank xodimini 500 million so‘mga chuv tushirdi. Bu haqda Samarqand viloyati IIB axborot xizmati xabar berdi.
Ma’lum qilinishicha, bank xodimining Telegram messenjeriga yutuq chiqqani haqida xabar kelgan. U xabarni ochishi bilan plastik kartasida bo‘lgan mablag‘lar noma’lum shaxslar tomonidan yechib olingan.
“Unga pul yutug‘ini yutib oldingiz degan zararlangan havola kelgan. Ustiga bosib, karta ma’lumotlari va SMS tasdiqlash kodni kiritganidan so‘ng plastik kartasida mavjud bo‘lgan 500 million so‘m pul o‘g‘irlangan”, — deydi kiberxavfsizlik bo‘limi mutaxassisi.
Ta’kidlanishicha, plastikdan o‘g‘irlangan pullar onlayn qimor o‘yinlariga sarflab yuborilgan.
Avvalroq Namanganda maktab o‘quvchisi ustozining plastik kartasidan 2 million so‘m yechib olgani to‘g‘risida xabar berilgandi. 2022-yil iyulda esa Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani aniqlangan edi. Iyul boshida bo‘lsa, Buxoro viloyati G‘ijduvon tumanidagi bank filiali kassiri mijozlarning 41 ta bank kartalaridagi mablag‘larni o‘g‘irlagani ma’lum bo‘ldi.
Izoh (0)