Андижон, Тошкент, Сирдарё вилоятлари ҳамда Тошкент шаҳрида ер майдонлари ва савдо дўконини сотиш билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Андижон туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбирда фуқаро Ж.М. ўзига тадбиркорлик фаолиятини амалга ошириш учун ажратилган ер майдонининг 15 сотихини фуқаро Г.З.га 21 минг доллар эвазига танишлари ёрдамида нотурар жой сифатида кадастр ҳужжатларини тайёрлаб беришини айтиб, олдиндан 15 минг долларни олган вақтида ашёвий далиллар билан ушланган.
Шу каби департаментнинг Чилонзор туман бўлими томонидан ўтказилган тезкор тадбирда фуқаролар М.Й. ва Б.С. ижара шартномаси асосида фойдаланиб келган Чилонзор деҳқон бозори балансидаги дўконни фуқаро Т.Й.га фирибгарлик йўли билан 4 минг долларга сотишга келишиб, шундан 2 минг долларни олган вақтида ашёвий далиллар билан ушланган.
Департаментнинг Пискент туман бўлими ва Тошкент вилояти ИИББ ходимлари ҳамкорлигида ўтказилган тезкор тадбирда фуқаро М.О. “Лолаариқ” МФЙда жойлашган боғдорчилик ва узумчилик ширкатига қарашли 6 сотих ер майдонини фуқаро М.Ш.га 3,5 минг долларга сотишга келишиб, шундан 1,5 минг долларни олган вақтида ашёвий далиллар билан ушланган.
Департамент ҳамда ДХХнинг Сирдарё тумани бўлимлари томонидан ўтказилган тезкор тадбирда фуқаро А.Х. Давлат кадастрлар палатасининг туман филиали ерларини аукционга чиқариш мутахассиси А.Т. билан ўзаро тил бириктириб фуқаро Ш.А.га “Исломобод” маҳалласи ҳудудидан ўтган М34 автомобиль йўли бўйида жойлашган 50 квадрат метр ўлчамдаги ер майдонини енгил типдаги савдо дўкони қуриш учун “E-auksion” электрон савдо платформасига жойлаштириши ва ютиб бериши эвазига 900 доллар ва 1,2 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)