Afg‘onistonda maktab o‘quvchilariga ochiq havoda dars o‘tilmoqda

Afg‘onistonning Uruzgon viloyatida boshlang‘ich sinf o‘quvchilariga qabriston yonida, ochiq havoda o‘tirgan holda dars o‘tilmoqda.

Sinfxonalardan tashqari kitoblar, o‘qituvchilar va o‘quv materiallarining yetishmasligi o‘quvchilar uchun asosiy muammolar hisoblanadi.

Uruzgondagi ushbu boshlang‘ich maktabda 500 nafar o‘quvchi, jumladan, 80 nafar qiz tahsil oladi, deb xabar berdi “Daryo”ning Afg‘onistondagi muxbiri.

Avvalroq “Tolibon” harakati vakillari Afg‘onistonning markaziy G‘azni viloyatidagi ikkita xususiy maktabni yopgandi. Bunga ta’lim dargohlarida ishlaydigan o‘qituvchilarning soqol oldirib yurgani sabab bo‘lgan.

Eslatib o‘tamiz, 2021-yil avgustida hokimiyatga kelganidan so‘ng, “Tolibon” 12 yoshdan oshgan qizlarning maktabga borishini taqiqladi. 2022-yil dekabr oyida afg‘on universitetlarida qizlar uchun darslar to‘xtatildi, keyinroq universitetlarda ayollar, jumladan, professor-o‘qituvchilarning ham ishlashi taqiqlandi. Umuman olganda, “Tolibon” izchil ravishda qizlarning ta’limini cheklash siyosatini olib bormoqda, o‘g‘il bolalarga esa imkon qadar diniy ta’lim berishga urinmoqda.