Afg‘onistonning Panjsher viloyati aholisi aytishicha, “Tolibon” viloyatdagi ko‘plab maktablar binolaridan harbiy post sifatida foydalanmoqda. Bu haqda The Print nashri xabar berdi.
Panjsherliklar “Tolibon”ni xavfsizlik kuchlarini harbiy bazalarga ko‘chirishga chaqirdi.
“Bu haqiqat va ularning maktablarga joylashtirilishiga ko‘z yummaslik kerak. Harbiylar maktablarga o‘rnashib olganiga, bu esa o‘quvchilar va odamlarning ma’naviyatiga ta’sir qilayotganiga guvoh bo‘lyapmiz”, — deydi panjsherlik Samiulla Sodiqiy.
Obid ismli yana bir aholi vakili ta’lim sifati tushib ketganini aytdi.
“Bazarakdagi maktabda harbiylar bor, shuning uchun maktab ta’limiga kam e’tibor qaratilyapti”.
Shuningdek, aholi turar joylarida harbiylar borligi sabab panjsherliklar orasida vahima ko‘tarilmoqda.
“Harbiylar maktab va qishloqlarda. Biz Islom Amirligini harbiylarni bu hududdan olib chiqishga chaqiramiz”, — deydi panjsherlik Mian Ahmad Ilhom.
“Tolibon” matbuot kotibi Zabihulloh Mujohidning aytishicha, bu muammoga yechim topish uchun harbiy amaldorlar bilan maslahat qilinadi.
“Biz bu masalani Panjsherdagi rasmiylarga bildirdik, u yerga xavfsizlik bilan bog‘liq muammolarni oldini olish uchun joylashtirilgan harbiylarga muqobil yo‘l topish va maktablarni evakuatsiya qilish uchun rasmiylar bilan maslahatlashdik. Bu masalani Ta’lim vazirligiga ham bildirdik”, — dedi Mujohid.
Eslatib o‘tamiz, 2021-yilning sentabr oyida “Tolibon” Kobulni egallagach, Panjsherdagi Milliy qarshilik fronti uzoq vaqt toliblarga taslim bo‘lmadi. Frontga “Panjsher arsloni” nomi bilan tanilgan Ahmad Shoh Mas’udning o‘g‘li Ahmad Mas’ud rahbarlik qiladi.
Izoh (0)