“Tolibon” harakati vakillari Afg‘onistonning markaziy G‘azni viloyatidagi ikkita xususiy maktabni yopdi. Bunga ta’lim dargohlarida ishlaydigan o‘qituvchilarning soqol oldirib yurgani sabab bo‘lgan, deb xabar bermoqda Hasht-e Subh gazetasi mahalliy manbalarga tayanib.
Manbalarning aytishicha, maktablarni yopish to‘g‘risidagi qarorning yana bir sababi o‘qituvchilarning hijob o‘rash me’yorlariga rioya qilmagani ham bo‘lishi mumkin. Maktablar 2-oktyabr kuni Ezgulikni targ‘ib qilish va illatlarga qarshi kurash vazirligining mahalliy hukumati qarori bilan yopilgan.
Bundan tashqari, “Tolibon” G‘azni shahridagi ikkita bolalar ta’lim markazini yopgan, chunki ushbu muassasalarda qizlar darsga qatnashayotgan edi. Shu bilan birga markazlarda turli jinsdagi bolalar uchun ta’lim “Tolibon” talablariga muvofiq olib borilgan: ular alohida o‘qitilgan.
“Tolibon” G‘azni viloyatidagi ta’lim markazlariga qizlarning kirishini taqiqlagani haqida 21-iyun kuni ma’lum bo‘lgandi. Ushbu yangi qoidaga rioya qilmagan taqdirda ta’lim muassasalari rahbariyatiga jazo qo‘llash bilan tahdid qilingan.
Eslatib o‘tamiz, 2021-yil avgustida hokimiyatga kelganidan so‘ng, “Tolibon” 12 yoshdan oshgan qizlarning maktabga borishini taqiqladi. 2022-yil dekabr oyida afg‘on universitetlarida qizlar uchun darslar to‘xtatildi, keyinroq universitetlarda ayollar, jumladan professor-o‘qituvchilarning ham ishlashi taqiqlandi. Umuman olganda, “Tolibon” izchil ravishda qizlarning ta’limini cheklash siyosatini olib bormoqda, o‘g‘il bolalarga esa imkon qadar diniy ta’lim berishga urinmoqda.
Izoh (0)