Афғонистоннинг Урузгон вилоятида бошланғич синф ўқувчиларига қабристон ёнида, очиқ ҳавода ўтирган ҳолда дарс ўтилмоқда.
Синфхоналардан ташқари китоблар, ўқитувчилар ва ўқув материалларининг етишмаслиги ўқувчилар учун асосий муаммолар ҳисобланади.
Урузгондаги ушбу бошланғич мактабда 500 нафар ўқувчи, жумладан, 80 нафар қиз таҳсил олади, деб хабар берди “Дарё”нинг Афғонистондаги мухбири.
Аввалроқ “Толибон” ҳаракати вакиллари Афғонистоннинг марказий Ғазни вилоятидаги иккита хусусий мактабни ёпганди. Бунга таълим даргоҳларида ишлайдиган ўқитувчиларнинг соқол олдириб юргани сабаб бўлган.
Эслатиб ўтамиз, 2021 йил августида ҳокимиятга келганидан сўнг, “Толибон” 12 ёшдан ошган қизларнинг мактабга боришини тақиқлади. 2022 йил декабрь ойида афғон университетларида қизлар учун дарслар тўхтатилди, кейинроқ университетларда аёллар, жумладан, профессор-ўқитувчиларнинг ҳам ишлаши тақиқланди. Умуман олганда, “Толибон” изчил равишда қизларнинг таълимини чеклаш сиёсатини олиб бормоқда, ўғил болаларга эса имкон қадар диний таълим беришга уринмоқда.
Изоҳ (0)