“Tolibon” taktik yadro quroliga ega bo‘lish yo‘llarini o‘rganmoqda — sobiq razvedka rahbari

Afg‘onistonning sobiq milliy xavfsizlik xizmati boshlig‘i Rahmatulla Nabil “Tolibon” taktik yadro quroliga ega bo‘lish yo‘llarini o‘rganayotganini aytdi. Bu haqda Aamaj News xabar berdi.

Sobiq amaldor Dushanbeda bo‘lib o‘tayotgan Hirot xavfsizlik yig‘ilishida shunday bayonot bergan.

Menda “Tolibon” guruhi taktik yadro quroliga ega bo‘lish yo‘llarini tekshirayotgani haqida xabarlar bor, — degan u.

Nabilning qo‘shimcha qilishicha, “Tolibon” bu qurollarni Pokistondan olishi yoki ularni qo‘lga kiritish uchun muhandislarga pul to‘lashi mumkin. Afg‘oniston muvaqqat hukumati hozircha mazkur bayonotga hech qanday munosabat bildirmagan.

• 27-noyabr kuni Tojikiston poytaxtida “Tolibon” hukumatiga qarshi shaxslar, ekspertlar va siyosatchilar ishtirokida Hirot xavfsizlik anjumaniga start berildi. Ushbu anjuman ikki kun davom etadi, unda ishtirokchilar Afg‘onistondagi vaziyat haqida so‘z yuritadi.