Eronda o‘tgan yilgi namoyishlar ishtirokchisi bo‘lgan 21 yoshli yigit yashirincha qatl etildi. U Islom inqilobi posbonlari korpusi xavfsizlik xizmati xodimini o‘ldirishda ayblangan.
BBC Fors xizmati xabariga ko‘ra, 21 yoshli Milad Zohrevand 23-noyabr kuni ertalab Eron g‘arbidagi Hamadon shahrida joylashgan qamoqxonada qatl etilgan. Bu maʼlumotni Hengaw inson huquqlari tashkiloti ham tasdiqladi. Eron hukumati Milad Zohrevandning qatl etilgani haqida rasman xabar bermadi.
BBC taʼkidlaganidek, Milad Zohrevand o‘tgan yilgi ommaviy noroziliklarda qatnashib o‘lim jazosiga hukm qilingan sakkizinchi namoyishchi. Nashr manbalariga ko‘ra, sud jarayonida Zohrevandga advokat berilmagan.
Eronda ommaviy norozilik namoyishlari 2022-yil sentyabrida, “hijobni noto‘g‘ri o‘ragani” uchun hibsga olingan 22 yoshli Mahsa Aminiy qamoqxonada vafot etganidan ko‘p o‘tmay boshlangandi. Namoyishlarning dastlabki to‘rt oyidayoq 400 dan ortiq namoyishchi o‘ldirildi.
Izoh (0)