Rossiya Adliya vazirligi sobiq bosh vazir Mixail Kasyanovni “xorijiy agentlar” reyestriga kiritdi. Bu haqda 24-noyabr kuni vazirlik saytida xabar berildi.
Undan tashqari, yangilangan ro‘yxatga tarixchi Ilya Venyavkin, jurnalistlar Ilya Davlyatchin va Idris Yusupov, shuningdek, “Lyudi” mas’uliyati cheklangan jamiyati kiritilgan.
Rossiya Adliya vazirligi ma’lumotlariga ko‘ra, Venyavkin, Davlyatchin va Kasyanov Ukrainadagi urushga qarshi bo‘lgan, Yusupov esa Rossiya hukumati qarorlari haqida “yolg‘on ma’lumot tarqatgan”. Vazirlik da’vo qilishicha, “Lyudi” tashkiloti “xorijiy manbalardan yordam olgan”.
Mixail Kasyanov 2000-yil mayidan 2004-yil fevraligacha Rossiya hukumati raisi lavozimida ishlagan. U “Rossiya urushga qarshi qo‘mitasi”ning a’zosi hisoblanadi.
Rossiyada “xorijiy agentlar” to‘g‘risidagi qonun
Rossiyada “xorijiy agentlar” to‘g‘risidagi qonun 2012-yilda paydo bo‘lgan. O‘shandan beri bir necha yuzlab tashkilotlar va shaxslar ushbu ro‘yxatga kiritildi.
“Xorijiy agentlar” deb hisoblanuvchi jismoniy shaxslar reyestri 2022-yil aprel oyi boshida ishga tushirilgan bo‘lib, u Notijorat tashkilotlar – “xorijiy agentlar”, OAV – “xorijiy agentlar” va ro‘yxatdan o‘tmagan tashkilotlar – “xorijiy agentlar” ro‘yxati bilan bir qatorda to‘rtinchi ro‘yxat bo‘ldi. 2022-yil dekabridan boshlab qonun “chet eldan ko‘mak oladigan” va “chet el ta’siri ostida” bo‘lganlarni “xorijiy agent” deb e’lon qilishga ruxsat berdi.
Rossiya qonunchiligiga ko‘ra, “xorijiy agent” deb e’tirof etilgan fuqarolar va tashkilotlar o‘z faoliyati va xarajatlari to‘g‘risida Adliya vazirligiga muntazam ravishda hisobot taqdim etishi, barcha maqolalarida, jumladan, ijtimoiy tarmoqlarda ham “xorijiy agent” ekanini belgilab qo‘yishi shart.
Izoh (0)