Эронда ўтган йилги намойишлар иштирокчиси бўлган 21 ёшли йигит яширинча қатл этилди. У Ислом инқилоби посбонлари корпуси хавфсизлик хизмати ходимини ўлдиришда айбланган.
BBC Форс хизмати хабарига кўра, 21 ёшли Милад Зоҳреванд 23 ноябрь куни эрталаб Эрон ғарбидаги Ҳамадон шаҳрида жойлашган қамоқхонада қатл этилган. Бу маълумотни Hengaw инсон ҳуқуқлари ташкилоти ҳам тасдиқлади. Эрон ҳукумати Милад Зоҳреванднинг қатл этилгани ҳақида расман хабар бермади.
BBC таъкидлаганидек, Милад Зоҳреванд ўтган йилги оммавий норозиликларда қатнашиб ўлим жазосига ҳукм қилинган саккизинчи намойишчи. Нашр манбаларига кўра, суд жараёнида Зоҳревандга адвокат берилмаган.
Эронда оммавий норозилик намойишлари 2022 йил сентябрида, “ҳижобни нотўғри ўрагани” учун ҳибсга олинган 22 ёшли Маҳса Аминий қамоқхонада вафот этганидан кўп ўтмай бошланганди. Намойишларнинг дастлабки тўрт ойидаёқ 400 дан ортиқ намойишчи ўлдирилди.
Изоҳ (0)