Eronda qo‘lga olingan namoyishchilarni qatl qilishga ruxsat beruvchi rezolyutsiya ko‘pchilik ovoz bilan qo‘llab-quvvatlandi, deb xabar bermoqda IOL agentligi.
290 deputatning 227 nafari namoyish ishtirokchilariga “qattiqqo‘llik bilan saboq berib qo‘yish”ni yoqlab ovoz berdi. Rezolyutsiya qo‘lga olingan namoyishchilarni qatl qilishga ruxsat beradi.
“Biz sud tizimidan bu jinoyatlarni amalga oshirgan shaxslarga, jinoyatlarda yordam bergan va isyonchilarni gij-gijlaganlarning barchasiga qarshi qat’iy kurashishni so‘raymiz”, — dedi qonun chiqaruvchilar.
Deputatlar namoyishchilarning xatti-harakatlarini odamlarni hayotdan va mol-mulkdan mahrum qilayotgan ISHID terrorchilariga qiyosladi. Ayni paytda namoyishchilar orasidan qariyb 14 ming kishi hibsga olingan bo‘lib, endi ularning barchasi o‘lim jazosi xavfi ostida.
OAVlar ma’lumotlariga ko‘ra, 5-noyabr holatiga namoyishlar chog‘ida 318 kishi o‘ldirilgan, shularning 49 nafari voyaga yetmagan shaxslar bo‘lgan. Shuningdek, 38 nafar harbiyning o‘limi haqida xabar berilmoqda.
Eron yetakchilari namoyishchilarga qarshi qat’iy choralar ko‘rishga qaror qildi, aksiyalarni tashkillashtirishda esa ular AQSHni ayblamoqda.
Erondagi namoyishlarga nima sabab bo‘ldi?
Eronda namoyishlar sentabr o‘rtalarida, 22 yoshli Mahsa Aminiyning o‘limidan keyin boshlandi. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgan.Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.
Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.
Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagandi.
Izoh (0)