Toshkent viloyatining Zangiota tumanida yetishtirilib, Rossiyaning Irkutsk viloyatiga jo‘natilgan 3150 dona atirguldan karantin ostidagi hasharot aniqlandi. Bu haqda O‘simliklar karantini va himoyasi agentligi xabar berdi.
Qayd etilishicha, dastlabki fitosanitar nazorat davomida o‘simlik tamaki oqqanoti hasharoti bilan zararlangani aniqlangan. Bu haqda tadbirkorlik subyekti ogohlantirilib, fitosanitar ruxsatnoma berilishi rad etilgan. Shu o‘rinda eksportyorga tamaki oqqanoti zararli karantin osti hasharoti hisoblanishi, qarshi kurash choralari haqida ko‘rsatma va tavsiyalar berilgan. Ogohlantirishga qaramay tadbirkorning kafolat xati asosida gullar partiyasi eksport uchun yuklatilgan.
Tabiiyki, zararlangan o‘simlikni mamlakat hududiga olib kirishga “Rosselxoznadxor” tomonidan ruxsat etilmagan va bu haqda tashkilot o‘zining rasmiy manbalarida maʼlum qildi, — deyiladi xabarda.
Gullardagi hasharotlarni fumigatsiya, yaʼni zararsizlantirish orqali yo‘q qilib bo‘lmaydi. Sababi bunday holatda mahsulot tovar sifatida jozibadorligini yo‘qotadi. Shu bois O‘zbekistondan eksport qilingan 3150 dona atirgul tadbirkorning roziligi bilan yoqish yo‘li orqali yo‘q qilingan.
Rossiyaning Irkutsk viloyatiga jo‘natilgan 3150 dona atirgul bilan bir kunda boshqa tadbirkorlik subyekti tomonidan 9000 dan ortiq gul Markaziy fitosanitariya laboratoriyasi ekspertizasi xulosasi asosida fitosanitar ruxsatnoma rasmiylashtirilib, eksport uchun yuklatilgan. Bu partiyadagi o‘simlik mahsulotiga eʼtiroz bildirilmagan, — deyiladi xabarda.
May oyida Rossiyada o‘zbek gilosidan virus topilgani, bu O‘simliklar karantini va himoyasi agentligi tomonidan o‘rganilayotgani haqida xabar berilgan edi. O‘simliklar karantini va himoyasi agentligi vakili o‘shanda bu zararkunanda Rossiya uchun ham karantin hisoblanmasligini ma’lum qilgandi.
Izoh (0)