Samarqand viloyati Kattaqo‘rg‘on shahrida ish joyidagi portlash oqibatida vafot etgan ishchi nafaqasidan “urib” qolingani aniqlandi.
Xabar berilishicha, Kattaqo‘rg‘on shahrida yashovchi fuqaroning turmush o‘rtog‘i “Paxta tozalash zavodi” AJ 1-ishlab chiqarish brigadasining linterlash sexida chiqindilarni yig‘uvchi va tozalovchi vazifasida ishlab kelgan. Ammo u 2018-yilning 12-fevralida quritish sexi binosida kuchli gaz bosimi natijasida sodir bo‘lgan portlash oqibatida tan jarohati olib, vafot etgan.
Biroq korxona baxtsiz hodisa tufayli vafot etgani munosabati bilan marhumning oilasiga biryo‘la to‘lanadigan nafaqa pulini qariyb 10 million so‘mga kam to‘lagan. Ya’ni xodimning vafotigacha ishlagan o‘n oylik ish davri uchun 9 million 718 ming so‘mga noto‘g‘ri hisob-kitob qilinib, jami 46 million 15 ming so‘m nafaqa to‘langan.
Marhumning turmush o‘rtog‘i bundan norozi bo‘lib, Kattaqo‘rg‘on shahar adliya bo‘limiga murojaat qildi. Bo‘lim fuqaro manfaatida fuqarolik ishlari bo‘yicha Kattaqo‘rg‘on tumanlararo sudiga da’vo arizasi kiritdi. Sud majlisida korxonaning ishonchli vakili J.I. da’voni tan olmasdan, da’vo muddati o‘tib ketgani sababli uni qanoatlantirishni rad etishni so‘radi.
Sud da’vo arizasini qisman qanoatlantirib, “Kattaqo‘rg‘on paxta tozalash”ga biryo‘la to‘lanadigan nafaqadan 9 718 272 so‘m, 8 000 000 so‘m ma’naviy zararni to‘lash hamda davlat foydasiga 1 048 730,88 so‘m davlat boji undirish majburiyatini yukladi.
Izoh (0)