Rossiyaning Veterinar va fitosanitar nazorat federal xizmati (“Rosselxoznadzor”) 22-iyuldan Toshkent viloyatida yetishtirilgan pomidor va qalampir importini taqiqlab qo‘ydi.
Ushbu taqiqqa mazkur viloyatdan keltirilgan mahsulotlarda pomidor jigarrang bujmayish virusi (Tomato brown fruit virus) va pepino mozaika virusi (Pepino mosaic virus) aniqlangani sabab bo‘lgan.
22-iyulgacha yuklangan partiyalar fitosanitar ekspertizadan o‘tkazilganidan keyin mamlakat hududiga olib kirilishiga ruxsat beriladi.
Qayd etilishicha, O‘simliklar karantini davlat inspeksiyasi tomonidan tegishli tadqiqot natijalari va viruslardan xoli bo‘lgan korxonalarning aniq ro‘yxati yuborilganidan keyin ruxsat berish masalasi Rossiya tomonidan ko‘rib chiqiladi.
Avvalroq Rossiyada Buxorodan pomidor va qalampir import qilishga cheklov qo‘yilgani haqida xabar berilgandi.
Eslatib o‘tamiz, jigarrang bujmayish virusi aniqlangani sababli “Rosselxoznadzor” 2020-yil 26-noyabrdan boshlab Farg‘ona viloyatidan Rossiyaga pomidor va qalampir olib kirishni taqiqlagan edi. Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni Navoiy va Qashqadaryo viloyatida yetishtirilgan mahsulotlarga ham joriy etgan.
Rossiya 2021-yil aprel oyidagina O‘zbekistondagi 17 ta korxonadan pomidor va qalampir olib kirilishiga ruxsat bergandi.
Izoh (0)