Rossiyada o‘zbek gilosida sharq mevaxo‘ri hasharoti aniqlandi — O‘zbekiston o‘simliklar karantini va himoyasi agentligi

Avvalroq Rossiyada o‘zbek gilosidan virus topilgani, bu O‘simliklar karantini va himoyasi agentligi tomonidan o‘rganilayotgani haqida xabar berilgan edi. Holat yuzasidan agentlik direktorining matbuot kotibi Sabina Sadinova “Daryo”ga qo‘shimcha maʼlumot berdi.

“Vaziyatga oydinlik kiritish maqsadida Rosselxoznadzor federal xizmati bilan muzokaralar olib borildi. Rossiya tomoni ma‘lum qilishicha, Omsk viloyatiga yetib borgan gilos partiyasida sharq mevaxo‘ri hasharoti aniqlangan. Ikki tomonning kelishuviga asosan mahsulotdan namunalar olinib fitosanitariya laboratoriya tekshiruvi o‘tkazilishi, ekspertiza xulosasida sharq mevaxo‘ri lichinkalari tirik holda aniqlangan taqdirda fumigatsiya (zararsizlantirish) ishlari olib borilganidan so‘ng Federatsiya hududiga olib kirilishi belgilandi”, — dedi Sabina Sadinova.

Uning qo‘shimcha qilishicha, bu zararkunanda Rossiya uchun xam karantin hisoblanmaydi, takroran laboratoriya ekspertizasi o‘tkaziladi, yukda hasharotni tirigi topilsa fumigatsiya (zararsizlantirish) ishlari olib borilib, Rossiya hududiga kiritiladi.

Maʼlumot uchun, mazkur hasharot o‘simlikning o‘zi uchun xavfli, hosildorligiga taʼsir qiladi. Lekin inson organizmi uchun hech qanday zarari yo‘q.