Rossiya veterinariya va fitosanitariya nazorati bo‘yicha federal xizmati (“Rosselxoznadzor”) 7-apreldan Farg‘ona viloyatidan Rossiya hududiga pomidor va qalampirdan tashqari barcha o‘simlik mahsulotlarini olib kirishga ruxsat berdi. Bu haqda idora saytida ma’lum qilindi.
Unda aytilishicha, “Rosselxoznadzor” O‘zbekiston Vazirlar Mahkamasi huzuridagi o‘simliklar karantini bo‘yicha davlat inspeksiyasidan karantin ahamiyatiga ega bo‘lgan mahsulotlarni eksport qilishda fitosanitariya sertifikati ustidan nazorat kuchaytirilishi haqida ma’lumot olgan.
Shu sababli “Rosselxoznadzor” O‘zbekiston tomonning kafilligi bilan 2021-yil 7 apreldan boshlab pomidor va qalampirdan tashqari barcha o‘simlik mahsulotlarini Farg‘ona viloyatidan Rossiyaga olib kirishga ruxsat berish mumkin deb topgan.
Eslatib o‘tamiz, Farg‘ona viloyatida yetishtiriladigan pomidor va qalampir mahsulotlarining Rossiya hududiga olib kirilishiga taqiq 2020-yilning 26-noyabrida qo‘yilgan edi. Bunga ushbu mahsulotlarda karantin kasalligi tobamovirus aniqlanganligi sabab qilib ko‘rsatilgan.
Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni Navoiy va Qashqadaryo viloyatida yetishtirilgan mahsulotlarga ham joriy etgan.
Farg‘ona viloyati hokimi Xayrullo Bozorov Rossiyaga yuborilgan pomidordan chiqqan kasallik Farg‘onadagi birorta issiqxonada aniqlanmaganini aytgandi. 2020-yilning yanvarida O‘simliklar karantini davlat inspeksiyasi Rossiyaning O‘zbekistonning ayrim qishloq xo‘jaligi mahsulotlariga taqiq qo‘yishiga sabab bo‘lgan tashxis noto‘g‘ri bo‘lib chiqqanini ma’lum qildi. 2021-yilning mart oyida “Rosselxoznadzor” Rossiyaga Navoiy va Qashqadaryodagi oltita korxonadan pomidor olib kirishga ruxsat berdi.
Izoh (0)