Тошкент вилоятининг Зангиота туманида етиштирилиб, Россиянинг Иркутск вилоятига жўнатилган 3150 дона атиргулдан карантин остидаги ҳашарот аниқланди. Бу ҳақда Ўсимликлар карантини ва ҳимояси агентлиги хабар берди.
Қайд этилишича, дастлабки фитосанитар назорат давомида ўсимлик тамаки оққаноти ҳашароти билан зарарлангани аниқланган. Бу ҳақда тадбиркорлик субъекти огоҳлантирилиб, фитосанитар рухсатнома берилиши рад этилган. Шу ўринда экспортёрга тамаки оққаноти зарарли карантин ости ҳашароти ҳисобланиши, қарши кураш чоралари ҳақида кўрсатма ва тавсиялар берилган. Огоҳлантиришга қарамай тадбиркорнинг кафолат хати асосида гуллар партияси экспорт учун юклатилган.
Табиийки, зарарланган ўсимликни мамлакат ҳудудига олиб киришга “Росселхознадхор” томонидан рухсат этилмаган ва бу ҳақда ташкилот ўзининг расмий манбаларида маълум қилди, — дейилади хабарда.
Гуллардаги ҳашаротларни фумигация, яъни зарарсизлантириш орқали йўқ қилиб бўлмайди. Сабаби бундай ҳолатда маҳсулот товар сифатида жозибадорлигини йўқотади. Шу боис Ўзбекистондан экспорт қилинган 3150 дона атиргул тадбиркорнинг розилиги билан ёқиш йўли орқали йўқ қилинган.
Россиянинг Иркутск вилоятига жўнатилган 3150 дона атиргул билан бир кунда бошқа тадбиркорлик субъекти томонидан 9000 дан ортиқ гул Марказий фитосанитария лабораторияси экспертизаси хулосаси асосида фитосанитар рухсатнома расмийлаштирилиб, экспорт учун юклатилган. Бу партиядаги ўсимлик маҳсулотига эътироз билдирилмаган, — дейилади хабарда.
Май ойида Россияда ўзбек гилосидан вирус топилгани, бу Ўсимликлар карантини ва ҳимояси агентлиги томонидан ўрганилаётгани ҳақида хабар берилган эди. Ўсимликлар карантини ва ҳимояси агентлиги вакили ўшанда бу зараркунанда Россия учун ҳам карантин ҳисобланмаслигини маълум қилганди.
Изоҳ (0)