OTB 2023-yilda O‘zbekiston bilan qancha qiymatli shartnomalar imzolagani ochiqlandi

Osiyo taraqqiyot banki shu yilning o‘zida O‘zbekiston bilan 3,5 milliard dollarga yaqin miqdorda 25 ta loyiha imzolagan, deb xabar bermoqda O‘zA.

Xabarga ko‘ra, Osiyo taraqqiyot banki (OTB) tomonidan Markaziy hamda G‘arbiy Osiyo hududlarida amalga oshirilayotgan loyihalarning 17 foizi O‘zbekistonga to‘g‘ri kelmoqda. O‘zbekiston mintaqada bu ko‘rsatkich bo‘yicha ikkinchi o‘rinda. Joriy yilda jami 3,5 milliard dollarga yaqin miqdorda 25 ta loyiha imzolangan.

Osiyo taraqqiyot banki O‘zbekistonning 2023 va 2024-yil uchun iqtisodiy o‘sishi prognozini yaxshilagani xabar qilingandi. 

Hisobotda qayd etilishicha, O‘zbekiston iqtisodiyoti yaqin ikki yilda har yili 5,5 foizga o‘sadi. Aprel oyida bank 5 foizlik iqtisodiy o‘sishni prognoz qilgandi. Prognozni yaxshilashning sabablari orasida Rossiyaga oziq-ovqat va to‘qimachilik mahsulotlari eksportining ko‘payishi hamda investitsiyalarning o‘sishi ko‘rsatilgan.

O‘zbekiston iqtisodiyoti birinchi yarim yillikda 5,6 foizga o‘sgan va bu kutilganidan yuqori. Bu fiskal rag‘batlantirish, mustahkam tashqi savdo, sanoatning o‘sishi hamda tog‘-kon sanoati va investitsiyalarning ko‘payishi bilan qo‘llab-quvvatlangan. Biroq inflyatsiya tufayli iste’mol sekinlashgan.