Samarqand viloyati Toyloq tumanida ichki ishlar xodimlari tadbirkor ayollarga kuch ishlatgani aks etgan video tarqaldi. Tuman hokimligi axborot xizmati holat yuzasidan tushuntirish berdi.
Xabarga ko'ra, Toyloq tumani “Ilmobod” mahallasida yashovchi fuqaro Lo‘bat Eshto‘xtayeva va Zarina Jo‘rayevalar Samarqand viloyati “Suvoqova” davlat unitar korxonasi Toyloq tuman filiali balansida bo‘lgan 10 sotix yer maydonini noqonuniy ravishda egallab, atrofini uzunligi 25 metrdan iborat devor qurib olgan.
Mazkur yer maydonida ichimlik suvi inshootini qurish bo‘yicha Toyloq tumani hokimining 2019-yil 18-apreldagi 1045-sonli qarori qabul qilingan. Yerga da’vo qilayotgan fuqaro Eshto‘xtayeva Lo‘bat esa yerga egalik huquqini beruvchi hech qanday hujjat mavjud emas. Shu boisdan Kadastr palatasi Toyloq tuman filiali tomonidan o‘zboshimchalik bilan qurib olgan devorni o‘z xohishi bilan belgilangan muddat ichida buzib, o‘z holiga qaytarib qo‘yish bo‘yicha ogohlantirish berilgan.
Biroq fuqaro ogohlantirishlarga qaramay noqonuniy qurilgan devorni buzmagan. Mazkur yer maydoniga ichimlik suvi minorasini qurib, “Ilmobod” hamda “Bunyodkor” mahallalari aholisini toza ichimlik suvi bilan ta’minlash maqsadida joriy yilning 13-noyabr kuni viloyat hamda tuman hokimligi tomonidan tuzilgan ishchi guruh ishtirokida mazkur qurilma buzilib, holat tegishli tartibda rasmiylashtirilgan.
Buzish jarayoniga fuqaro Lo‘bat Eshto‘xtayeva hamda uning qarindoshlari faol qarshilik ko‘rsatgan. Jarayonda jamoat tartibini saqlash hamda fuqarolarning xavfsizligini ta’minlash maqsadida IIB xodimlari jalb qilingan.
Izoh (0)