“Daryo”da Toshkent shahrining Sergeli tumanida joylashgan ko‘p qavatli uyda yashovchi aholi vakillari uy sharoitidan shikoyat qilib, tahririyatga murojaat yo‘llagani, ularni atigi 2 ta muammo: liftlarning ishlamasligi va tomdan chakka o‘tishi qiynayotganini aytgani bayon qilingandi. Mazkur maqolaga munosabat bildirgan hokimlik tomdan chakka o‘tishi bilan bog‘liq holat eski video ekanini, lift esa binoyidek ishlayotganini bildirdi.
Tomdan suv o‘tishi bilan bog‘liq muammo bugungi murojaatdan ikki hafta avval Boshqaruv servis kompaniyasi xodimlari tomonidan bartaraf etilganini, ijtimoiy tarmoqlarda e’lon qilingan video eski ekanligini, ayni damda 14 qavatli uyning kirish yo‘laklari ham, ichki qismlari ham quruqligini va hech qayerdan chakka o‘tmayotganligini ma’lum qilamiz, — deyiladi hokimlikning rasmiy bayonotida.
Shuningdek, hokimlik uyning lifti nosozligidan tushgan murojaat bo‘yicha liftni ko‘zdan kechirishganida fuqarolar og‘ir yuklar tashiganligi sababli unda nosozlik yuzaga kelganligini, hozirgi vaqtda lift ta’mirlangan va fuqarolarga muammosiz xizmat ko‘rsatayotganligini yozgan.
“Daryo”ga bu haqda qo‘shimcha ma’lumot bergan murojaatchi, Hasan Abdug‘aniyev hokimlik jamoatchilikka yolg‘on ma’lumot tarqatayotganini aytmoqda.
Maqola e’lon qilingach, Sergeli tumani hokimligi bunga tezkor munosabat bildirib, voqea joyiga kelib, muammoni o‘rganib ketishibdi. Buning uchun ularga tashakkur aytamiz. Ammo, lekin, biroq hamon muammoga yechim yo‘q. Hatto yechim haqida lom-lim ham deyishmagan, — deydi murojaatchi.
Hasan Abdug‘aniyevning hokimlik mas’ullariga eslatishicha, ushbu turar joyda ikkita lift bor.
Ushbu uyimizda ikkita yonma-yon joylashgan lift bor. Shu liftlardan biri tez-tez nosozlikka uchraydi va to‘rt kishilik sig‘imga ega. Yonidagi, biz maqolada tilga olgan yuk tashishga mo‘ljallangan lift esa bir necha yillardan beri yopib tashlangan va mas’ullarni kutib, nosoz holatda yotibdi. Bu borada hokimlikka bir necha bor murojaat qilingan. Bu uyda 100 dan ortiq xonadon vakillari yashaydi va ularning barchasi shu kichkinagina liftdan foydalanadi. Hokimiyat vakillari aynan muammoli lift haqida bir og‘iz ham to‘xtalishmagan va uning taqdiri nima bo‘lishi haqida lom-lim deyishmagan, — deydi murojaatchi.
Aholi tomning yopilganini, bugungi yomg‘irda tomdan chakka o‘tmaganini tasdiqladi. Ammo oktyabrdan beri yomg‘ir yog‘magani sabab tomning ta’mirlanganidan bexabar qolishganini, ta’mirlash ishlari uchun mas’ullardan minnatdor ekanini qo‘shimcha qilishmoqda.
Bizda asosiy muammo ikkinchi, yuk tashishga mo‘ljallangan ko‘p sig‘imli liftning ishlamasligi. Biz aynan shu liftni ishlatib berishlarini so‘rganmiz. Hokimlik esa hammasi joyida degandek, jamoatchilikni chalg‘itish bilan ovora, — deydi murojaatchi.
“Daryo” voqealar rivojini kuzatishda davom etib, hokimlikning aholining yanayam aniqlashtirilgan muammosiga nima deb javob berishini jamoatchilikka olib chiqishga tayyorligini bildiradi.
Izoh (0)