“Дарё”да Тошкент шаҳрининг Сергели туманида жойлашган кўп қаватли уйда яшовчи аҳоли вакиллари уй шароитидан шикоят қилиб, таҳририятга мурожаат йўллагани, уларни атиги 2 та муаммо: лифтларнинг ишламаслиги ва томдан чакка ўтиши қийнаётганини айтгани баён қилинганди. Мазкур мақолага муносабат билдирган ҳокимлик томдан чакка ўтиши билан боғлиқ ҳолат эски видео эканини, лифт эса бинойидек ишлаётганини билдирди.
Томдан сув ўтиши билан боғлиқ муаммо бугунги мурожаатдан икки ҳафта аввал Бошқарув сервис компанияси ходимлари томонидан бартараф этилганини, ижтимоий тармоқларда эълон қилинган видео эски эканлигини, айни дамда 14 қаватли уйнинг кириш йўлаклари ҳам, ички қисмлари ҳам қуруқлигини ва ҳеч қаердан чакка ўтмаётганлигини маълум қиламиз, — дейилади ҳокимликнинг расмий баёнотида.
Шунингдек, ҳокимлик уйнинг лифти носозлигидан тушган мурожаат бўйича лифтни кўздан кечиришганида фуқаролар оғир юклар ташиганлиги сабабли унда носозлик юзага келганлигини, ҳозирги вақтда лифт таъмирланган ва фуқароларга муаммосиз хизмат кўрсатаётганлигини ёзган.
“Дарё”га бу ҳақда қўшимча маълумот берган мурожаатчи, Ҳасан Абдуғаниев ҳокимлик жамоатчиликка ёлғон маълумот тарқатаётганини айтмоқда.
Мақола эълон қилингач, Сергели тумани ҳокимлиги бунга тезкор муносабат билдириб, воқеа жойига келиб, муаммони ўрганиб кетишибди. Бунинг учун уларга ташаккур айтамиз. Аммо, лекин, бироқ ҳамон муаммога ечим йўқ. Ҳатто ечим ҳақида лом-лим ҳам дейишмаган, — дейди мурожаатчи.
Ҳасан Абдуғаниевнинг ҳокимлик масъулларига эслатишича, ушбу турар жойда иккита лифт бор.
Ушбу уйимизда иккита ёнма-ён жойлашган лифт бор. Шу лифтлардан бири тез-тез носозликка учрайди ва тўрт кишилик сиғимга эга. Ёнидаги, биз мақолада тилга олган юк ташишга мўлжалланган лифт эса бир неча йиллардан бери ёпиб ташланган ва масъулларни кутиб, носоз ҳолатда ётибди. Бу борада ҳокимликка бир неча бор мурожаат қилинган. Бу уйда 100 дан ортиқ хонадон вакиллари яшайди ва уларнинг барчаси шу кичкинагина лифтдан фойдаланади. Ҳокимият вакиллари айнан муаммоли лифт ҳақида бир оғиз ҳам тўхталишмаган ва унинг тақдири нима бўлиши ҳақида лом-лим дейишмаган, — дейди мурожаатчи.
Аҳоли томнинг ёпилганини, бугунги ёмғирда томдан чакка ўтмаганини тасдиқлади. Аммо октябрдан бери ёмғир ёғмагани сабаб томнинг таъмирланганидан бехабар қолишганини, таъмирлаш ишлари учун масъуллардан миннатдор эканини қўшимча қилишмоқда.
Бизда асосий муаммо иккинчи, юк ташишга мўлжалланган кўп сиғимли лифтнинг ишламаслиги. Биз айнан шу лифтни ишлатиб беришларини сўрганмиз. Ҳокимлик эса ҳаммаси жойида дегандек, жамоатчиликни чалғитиш билан овора, — дейди мурожаатчи.
“Дарё” воқеалар ривожини кузатишда давом этиб, ҳокимликнинг аҳолининг янаям аниқлаштирилган муаммосига нима деб жавоб беришини жамоатчиликка олиб чиқишга тайёрлигини билдиради.
Изоҳ (0)