Sergeli tumani hokimligi 19-noyabr kuni qurilish maydonida kran qulab tushgani yuzasidan munosabat bildirdi.
Tuman hokimligi vakillari voqea joyiga borib, vaziyat bilan tanishdi. Qurilish bo‘yicha ish boshqaruvchi I.Noraliyevning bergan ma’lumotiga ko‘ra, ertalab qurilish obyekti ko‘zdan kechirilayotganda yog‘ingarchilik natijasida yer yumshashi tufayli kranning yerga cho‘kish holati aniqlangan. Buning xavfliligini bilgan boshqaruvchi kranni demontaj qilish zarurligini aytgan.
Soat 09:00 da texnik xizmat ko‘rsatish firmasi tomonidan kranning demontaj ishlari boshlangan va kranning o‘zi yerga cho‘kishi oqibatida demontaj jarayonida qulab tushgan. Shuningdek, “Kranda odam borligi haqida aytilmoqda” degan isbotlanmagan ma’lumot ham tarqatilgan. Tuman matbuot xizmati bir kun oldin ushbu kranni boshqargan 1995-yilda tug‘ilgan I.Madiyev bilan yuzma-yuz suhbatda bo‘ldi.
Kran boshqaruvchisining so‘zlariga ko‘ra, haqiqatdan ham bir kun oldin u kranni boshqargan. Ammo bugun ertalabki demontaj ishlari tufayli kranga chiqmagan va umuman boshqarmagan. Ish boshqaruvchi I.Noraliyev hozirda hududning 90 foizi xavfsiz holatda ekanini aytib, yog‘ingarchilikdan so‘ng ishchilar o‘z ishlarini davom ettirishi, yiqilgan kran esa utilizatsiya qilinishini ta’kidladi.
Hozirda FVV, Ichki ishlar xodimlari va Sergeli tumani hokimligining mas’ul vakillari vaziyatni to‘liq o‘z nazoratiga olgan.
Shuningdek, Qurilish vazirligi ham sodir bo‘lgan hodisa yuzasidan ma’lumot berdi. Unga ko‘ra, “Choshtepa” MFY Jo‘nariq ko‘chasi manzilida joylashgan 16 qavatli turar joy binolarini qurish obyekti bo‘yicha Vazirlar Mahkamasining 2018-yil 18-maydagi “Arxitektura va qurilish sohasida davlat xizmatlari ko‘rsatishning ma’muriy reglamentlarini tasdiqlash to‘g‘risida”gi 370-sonli qaroriga asosan shahar Qurilish bosh boshqarmasi Loyiha-smeta hujjatlarini kelishish bo‘yicha Arxitektura va shaharsozlik kengashi ishchi organi tomonidan xulosa berilgan.
“Complex graphics” MCHJ loyiha tashkiloti tomonidan ishlab chiqilgan ishchi loyihani “Shaharsozlik hujjatlari ekspertizasi” DUK ko‘rib chiqib, yig‘ma ekspert xulosasi olingan. Vazirlar Mahkamasining 2022-yil 20-apreldagi qaroriga asosan shahar Qurilish sohasida hududiy nazorat inspeksiyasidan o‘rnatilgan tartibda xabarnoma yuborish yo‘li bilan qurilish-montaj ishlari boshlash uchun ro‘yxatdan o‘tgan.
Inspeksiya tomonidan qurilish obyektida monitoring ishlari o‘tkazilgan bo‘lib, “Omega agro stroy” MCHJning qurilish ishlari bo‘yicha mas’ul xodimlariga qurilishda yo‘l qo‘yilayotgan kamchiliklar, qurilish davrida yuritilishi kerak bo‘lgan ijro hujjatlari o‘z vaqtida yuritilmayotgani hamda “Qurilishda xavfsizlik texnikasi”ning qurilish maydonida mehnat muhofazasi va texnika xavfsizligi qoidalariga rioya etilishi yuzasidan “Davlat nazorati” elektron tizim platformasi orqali ko‘rsatmalar berilgan.
Inspeksiya tomonidan 19-noyabrda qurilish maydonidagi minora kranini demontaj qilinayotgan vaqtda qulagani yuzasidan joyiga chiqib o‘rganilganda qurilish obyekti, qurilish qatnashchilari va kran boshqaruvchisiga hech qanday jarohat yetmagani aniqlangan. Hozirda ushbu holat bo‘yicha ishchi guruh o‘rganish ishlarini olib bormoqda.
Mavzuga doir: Toshkentdagi qurilish maydonida kran qulab tushdi (video)
Izoh (0)