Mikroto‘lqinli pechlarning ommalashishi insonlarning kundalik hayotdagi yumushlarni sezilarli darajada yengillashtirdi. Taomni tovaga solash, plita ustida isitish va qaytadan likopga olish kabi ovoragarchiliklarga ehtiyoj qolmadi. Mikroto‘lqinli pechdan suyuqliklarni isitish, mahsulotlarni muzdan tushirish, hattoki ayrim yeguliklarni pishirish uchun ham foydalana boshladilar.
Biroq ushbu texnika mo‘jizasidan ayrim mahsulotlarga termik ishlov berishda foydalanmagan maʼqul. Misol uchun, ekspertlar ancha vaqtdan beri sutni mikroto‘lqinli pech yordamida isitib bo‘lmasligini taʼkidlab kelishadi. Buning sababini quyida bilib olasiz.
Ishlash prinsipi
Eng avvalo mikroto‘lqinli pechning qanday ishlashini tushunib olish kerak bo‘ladi. Demak, ushbu qurilma magnetron hisobiga ishlaydi. Aynan u pech ichida elektromagnit maydon mikroto‘lqinlarini hosil qiladi, ushbu to‘lqinlar o‘z navbatida isitilayotgan mahsulotga taʼsir ko‘rsatadi.
Uning tarkibidagi suv molekulalari tezroq harakatlana boshlaydi va issiqlik hosil qilinadi. Shu tariqa mikroto‘lqinli pech ichiga joylashtirilgan suyuqlik harorati ko‘tariladi.
Olimlar fikri
Bugungi kunga qadar olimlar tomonidan mikroto‘lqinli pechlarning zarari mavzusida juda ko‘p tadqiqotlar o‘tkazilgan. Mutaxassislarning ayrimlari ushbu maishiy qurilma mahsulotlarning tarkibidagi parchalanish jarayonini tezlashtiradi degan fikrda. Shuning uchun ham go‘sht, bo‘tqa, sut kabi mahsulotlar mikroto‘lqinli pech ichiga joylashtirilganda kanserogenlar hosil bo‘ladi. Kanserogenlar esa saratonni keltirib chiqaradigan asosiy sababchilardan biri hisoblanadi.
Suyuqliklar orasidan ona sutini ham mikroto‘lqinli pech yordamida isitish mumkin emas. Ko‘p hollarda onalar sutni maxsus idishga ichiga solib qo‘yishadi. Harorati mo‘tadil bo‘lishi uchun esa mikroto‘lqinli pechda qizdirib olishadi. Biroq, mikroto‘lqinlar taʼsirida ona suti tarkibidagi aminokislotalar buyraklar va asab tizimi uchun katta xavf tug‘diradigan izomerlarga aylanadi.
Shuningdek...
Sutni mikroto‘lqinli pech yordamida qizdirishning salbiy oqibatlaridan yana biri – uning tarkibidagi foydali birikmalarning yo‘q bo‘lib ketishidir. Bundan tashqari, mikroto‘lqinlar taʼsirida mahsulot tarkibida organizm uchun zararli patogenlar hosil bo‘ladi. Amaliy nuqtayi nazardan esa sutni ko‘proq qizdirib yuborsangiz, “ivib” qolishi hech gap emas.
.jpg)
Albatta, mikroto‘lqinli pech ham, uning to‘lqinlari ham mahsulotlarning tarkibiga hech qanday taʼsir ko‘rsatmasligini taʼkidlaydigan olimlar ko‘p. Ammo bundan bir necha yil ilgari Ispaniyada o‘tkazilgan tadqiqotda mikroto‘lqinli pechda qizdirilgan brokkoli foydali xususiyatlarining 98%ini yo‘qotgani aniqlangan.
Sutga mikroto‘lqinli pech yordamida termik ishlov berish qanday oqibatlarga olib kelishini esa tasavvur qilavering.
Izoh (0)