Микротўлқинли печларнинг оммалашиши инсонларнинг кундалик ҳаётдаги юмушларни сезиларли даражада енгиллаштирди. Таомни товага солаш, плита устида иситиш ва қайтадан ликопга олиш каби оворагарчиликларга эҳтиёж қолмади. Микротўлқинли печдан суюқликларни иситиш, маҳсулотларни муздан тушириш, ҳаттоки айрим егуликларни пишириш учун ҳам фойдалана бошладилар.
Бироқ ушбу техника мўжизасидан айрим маҳсулотларга термик ишлов беришда фойдаланмаган маъқул. Мисол учун, экспертлар анча вақтдан бери сутни микротўлқинли печ ёрдамида иситиб бўлмаслигини таъкидлаб келишади. Бунинг сабабини қуйида билиб оласиз.
Ишлаш принципи
Энг аввало микротўлқинли печнинг қандай ишлашини тушуниб олиш керак бўлади. Демак, ушбу қурилма магнетрон ҳисобига ишлайди. Айнан у печ ичида электромагнит майдон микротўлқинларини ҳосил қилади, ушбу тўлқинлар ўз навбатида иситилаётган маҳсулотга таъсир кўрсатади.
Унинг таркибидаги сув молекулалари тезроқ ҳаракатлана бошлайди ва иссиқлик ҳосил қилинади. Шу тариқа микротўлқинли печ ичига жойлаштирилган суюқлик ҳарорати кўтарилади.
Олимлар фикри
Бугунги кунга қадар олимлар томонидан микротўлқинли печларнинг зарари мавзусида жуда кўп тадқиқотлар ўтказилган. Мутахассисларнинг айримлари ушбу маиший қурилма маҳсулотларнинг таркибидаги парчаланиш жараёнини тезлаштиради деган фикрда. Шунинг учун ҳам гўшт, бўтқа, сут каби маҳсулотлар микротўлқинли печ ичига жойлаштирилганда кансерогенлар ҳосил бўлади. Кансерогенлар эса саратонни келтириб чиқарадиган асосий сабабчилардан бири ҳисобланади.
Суюқликлар орасидан она сутини ҳам микротўлқинли печ ёрдамида иситиш мумкин эмас. Кўп ҳолларда оналар сутни махсус идишга ичига солиб қўйишади. Ҳарорати мўтадил бўлиши учун эса микротўлқинли печда қиздириб олишади. Бироқ, микротўлқинлар таъсирида она сути таркибидаги аминокислоталар буйраклар ва асаб тизими учун катта хавф туғдирадиган изомерларга айланади.
Шунингдек...
Сутни микротўлқинли печ ёрдамида қиздиришнинг салбий оқибатларидан яна бири – унинг таркибидаги фойдали бирикмаларнинг йўқ бўлиб кетишидир. Бундан ташқари, микротўлқинлар таъсирида маҳсулот таркибида организм учун зарарли патогенлар ҳосил бўлади. Амалий нуқтаи назардан эса сутни кўпроқ қиздириб юборсангиз, “ивиб” қолиши ҳеч гап эмас.
.jpg)
Албатта, микротўлқинли печ ҳам, унинг тўлқинлари ҳам маҳсулотларнинг таркибига ҳеч қандай таъсир кўрсатмаслигини таъкидлайдиган олимлар кўп. Аммо бундан бир неча йил илгари Испанияда ўтказилган тадқиқотда микротўлқинли печда қиздирилган брокколи фойдали хусусиятларининг 98%ини йўқотгани аниқланган.
Сутга микротўлқинли печ ёрдамида термик ишлов бериш қандай оқибатларга олиб келишини эса тасаввур қилаверинг.
Изоҳ (0)