Avgust oyi boshida bosh vazir Abdulla Aripov Toshkentda uy sotib olmoqchi bo‘lgan mingdan ortiq fuqarolarni chuv tushirgan Aziya Invest Favorit MCHJ qurilish firmasi masalasi bo‘yicha jabrlanganlar bilan uchrashuv o‘tkazgandi.
Uchrashuvda bosh vazir Abdulla Aripov qurilish firmasiga aldanib qolgan mingdan ortiq fuqarolarga Bektemir tumanidagi “Iyk ota” massividan uylar qurib berilishini aytgan edi.
“Shahar qurilish invest”ning “Daryo”ga maʼlum qilishicha, hukumat komissiyasi topshirig‘iga ko‘ra ayni vaqtda uylarni qurish ishlari boshlab yuborilgan.
Aytilishicha, massivda 11,4 gektar bo‘sh yer maydoni tanlab olingan. Birinchi bosqichda ushbu yer maydonining 4,4 gektariga umumiy maydoni 61 ming 766 kv metr bo‘lgan 1104 xonadonli 16 ta 9 va 12 qavatli temir-beton quyma monolit tipdagi uylar quriladi.
Shuningdek, massiv hududida mahalliy budjetdan ajratilayotgan 29 mlrd so‘m mablag‘ hisobidan 990 o‘rinli umumtaʼlim maktabi joriy yilda foydalanishga topshiriladi. Bundan tashqari, ushbu massivda bog‘cha ham quriladi.
Uylarni 2024-yil yakuniga qadar to‘liq foydalanishga topshirish rejalashtirilgan.
Qurib bitkazilgan uy-joylarni jabrlangan fuqarolarga taqsimlash:
– avvalgi pudrat tashkiloti bilan tuzilgan shartnomaga asosan 100 foiz pulini to‘lagan (320 nafar) fuqarolarga beg‘araz beriladi;
– shartnomaga asosan belgilangan mablag‘ni bir qismini to‘lagan fuqarolarga ham uy beriladi, lekin shartnomadagi xonadon maydonining to‘lanmagan qismiga har bir kv metr maydon uchun qo‘shimcha tarzda to‘lov qilishadi;
– jabrlanuvchi fuqarolar tomonidan avvalgi pudrat tashkiloti bilan tuzilgan investitsiya shartnomasiga asosan sotib olingan xonadonning umumiy kvadrat metri o‘zgargan taqdirda, uning oshgan qismi bo‘yicha har bir kvadrat metrga qurilish tannarxida qo‘shimcha to‘lov amalga oshiriladi.
Pulini qaytarib olish istagida bo‘lgan fuqarolarga to‘lagan pul mablag‘lari tergov-sud jarayonlari yakunlangandan keyin pudrat tashkilotining davlat foydasiga tergov jarayonida xatlangan mol-mulklarni sotish evaziga tushgan mablag‘lar hisobidan qaytarib beriladi (tergov va sud jarayonlari muayyan vaqt olishi mumkin).
163 milliardlik firibgarlik
Aziya Invest Favorit MCHJ tomonidan 1106 nafar fuqaro bilan umumiy maydoni 61 ming 766 kv metr bo‘lgan xonadonni sotish bo‘yicha shartnomalar imzolangan va fuqarolar tomonidan 163,4 milliard so‘m naqd pul to‘langan.
Bugungi kunga qadar 1 ming 106 nafar fuqarodan 1 ming 60 nafari Bosh prokuraturaning tergov guruhi tomonidan jabrlanuvchi sifatida so‘roq qilinib, shartnoma va to‘lov kvitansiyalarining haqqoniyligi o‘rganilgan.
Qolgan 46 nafar fuqaro hali tergovchilarga kelib uchrashmagan (so‘roq qilinmagan). 1 ming 106 nafar fuqarodan 321 tasi shartnomada ko‘rsatilgan summaning 100 foizini, 202 nafari 70 foizdan yuqori qismini, 298 nafar fuqaro 50 foizdan 70 foizgacha qismini, 228 nafar fuqaro 30 foizdan 50 foizgacha bo‘lgan qismini, 51 nafar fuqaro 30 foizgacha bo‘lgan qismini to‘lagan. Shuningdek, 6 nafar fuqaro umuman pul to‘lamagan.
Hozirda tergov harakatlari davom etmoqda.
Mavzuga doir:
- Toshkentda kreditga uy olib berishni va’da qilib, fuqarolarni 1,9 mlrd so‘m va 18,1 ming dollarga chuv tushirganlar aniqlandi
- Toshkentda “novostroyka” bahonasida minglab odamni aldagan MCHJ rahbarining 200 mlrd so‘mlik mol-mulki xatlandi
- Abdulla Aripov Toshkentda “novostroyka”ga pul to‘lab kuygan mingdan ortiq fuqaro bilan uchrashdi
- Hukumat komissiyasi “novostroyka”ga pul to‘lab kuygan fuqarolar muammosini hal etish bo‘yicha 2 ta taklifni berdi
- Aziya Invest Favorit chuv tushirgan fuqarolarga ko‘p qavatli uylarni qurish uchun Bektemirdan yer ajratish taklif etildi
Izoh (0)