Statsionar sharoitda antibiotiklarni qo‘llash chog‘ida kuzatilishi mumkin bo‘lgan xavfli reaksiyalar yuz berganda bemorga qanday yordam berish kerakligi bo‘yicha Farmakologik nazorat bo‘limi yetakchi mutaxassisi Ravshan Abdullayev o‘z fiklarini bildirdi.
Mutaxassisning aytishicha, mabodo antibiotik dori vositasi qabul qilinganidan keyin nojo‘ya taʼsir reaksiyasi rivojlansa, birinchi navbatda eng xavfli anafilaktik yoki allergik shok kuzatilishi mumkin.
“Anafilaktik yoki allergik shokni o‘z vaqtida, iloji boricha tez fursatda aniqlash lozim. Ko‘pincha buni faqat ixtisoslashgan mutaxassisgina qilishi mumkin.
Bunda mutaxassis nojo‘ya taʼsirning shokligini va darajasini aniqlaydi. Undan keyin shunga muvofiq yordam ko‘rsatadi. Birinchi shokka qarshi dori vositalari kerak bo‘ladi. Gohida ular ham yetarli bo‘lmay qolganda shokdan chiqarish uchun qo‘shimcha uskunalar lozim bo‘ladi. Masalan, kislorod niqobi. Tezda yurakni muolaja qilishga to‘g‘ri keladi. Agar yurak to‘xtab qolib, fibrilatsiya yuz bersa, defibrillyator kerak bo‘ladi.
Yuqorida men sanab o‘tgan muolajalar faqatgina bemor hayotini saqlab qolish uchungina amalga oshiriladigan ishlardir. Undan keyin, yaʼni bemor shok holatidan chiqarilganidan keyin to‘liq statsionar davolanishi lozim”, — dedi Ravshan Abdullayev.
Mutaxassis yuqoridagi muolajalarni uy sharoitida qilsa bo‘ladimi, degan savolga javob berdi.
“Yo‘q, uy sharoitida qilib bo‘lmaydi. Shuning uchun bunday dori vositalarini faqat shifoxonada — ixtisoslashtirilgan xonasi va mutaxassisi bo‘lgan joylarda olish maqsadga muvofiq”, — dedi u.
Avvalroq Toshkentda 13-sentabr kuni “Dunyo bo‘ylab” telekanalining 31 yoshli boshlovchisi Ramina Yagafarova vafot etgani va o‘limidan bir kun oldin levofloksatsin (antibiotik) dorisini isteʼmol qilgani haqida xabar berilgan edi.
Sud-tibbiyot ekspertizasi ma’lumotlariga ko‘ra, jurnalistning o‘limi “doridan allergik reaksiya. Bosh miya o‘pka o‘tkir ishishi. O‘tkir nafas yurak-qon tomir yetishmovchiligi. Anafilaktik shok” tufayli yuzaga kelgan.
Mavzuga doir:
Izoh (0)