Toshkent shahar Mirobod tumanida fuqarolarga uy olib berishni vaʼda qilib, ularning pulini o‘zlashtirgan shaxs aniqlandi, deb xabar beradi Bosh prokuratura huzuridagi departament.
Qayd etilishicha, departamentning Mirobod tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan. Tekshiruvda “C.B.” MCHJ rahbari M.N. va boshqalar 14 nafar fuqaroga Toshkent shahri va viloyatidan kreditga uy olib berishni vaʼda qilib, soxta shartnomalar tuzish orqali ularning 1,9 milliard so‘m va 18,1 ming dollarini firibgarlik yo‘li bilan qo‘lga kiritganliklari aniqlangan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
5-avgust kuni bosh vazir Abdulla Aripov Toshkent shahrida Aziya Invest Favorit MCHJ tomonidan qurilayotgan ko‘p qavatli uy-joylardagi xonadonlarning fuqarolarga sotilishi yuzasidan kelib chiqqan nizoli vaziyat qatnashchilari bilan uchrashuv o‘tkazgandi.
Ma’lumotlarga ko‘ra, ushbu MCHJ mansabdorlari tomonidan fuqarolarga yetkazilgan zarar 300 milliard so‘mdan oshadi. Holat yuzasidan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilgan.
Bosh vazir o‘rinbosari Ochilboy Ramatov boshchiligidagi Hukumat komissiyasi tomonidan Bosh prokuratura bilan hamkorlikda 2 ta holat bo‘yicha ham jabrlangan fuqarolarning muammolarini hal etish yuzasidan tayyorlangan takliflar e’lon qilgan.
Izoh (0)