Toshkent shahrida 13-sentabr kuni vafot etgan “Dunyo bo‘ylab” telekanalining 31 yoshli boshlovchisi Ramina Yagafarova o‘limidan bir kun avval Levofloksatsin (antibiotik) dorisini isteʼmol qilgani aytilmoqda.
“Daryo” muxbiri yig‘gan maʼlumot ko‘ra, Levofloksatsin (antibiotik) dorisi Sog‘liqni Saqlash vazirligi huzuridagi Farmatsevtika mahsulotlari xavfsizligi markazi davlat muassasasi tomonidan ro‘yxatdan o‘tkazilgan.
Dori vositalari, tibbiy buyumlar va tibbiyot texnikalari uchun berilgan muvofiqlik sertifikatlari monitoringining yagona axborot tizimida Levofloksatsin (antibiotik) qidiruvga berilganda dorining o‘nga yaqin turi ro‘yxatga olinganini ko‘rish mumkin.
Qonunchilikka ko‘ra, dori vositalarining, tibbiy buyumlarning va tibbiy texnikaning tibbiyot amaliyotida qo‘llanilishiga, qoida tariqasida, ular davlat ro‘yxatidan o‘tkazilgandan keyin ruxsat etiladi.
Reyestr bergan maʼlumotlarga ko‘ra, Qozog‘iston, Ukraina, Rossiya, Belarus, Hindiston, Turkiya ishlab chiqaruvchilari tomonidan ishlab chiqarilgan Levofloksatsin savdo nomidagi dori vositasi davlat ro‘yxatidan o‘tkazilgan bo‘lib, ushbu dori vositalari sifatini tasdiqlovchi muvofiqlik sertifikatiga ega.
Sud-tibbiyot ekspertizasi doridan allergik reaksiya deb baholamoqda
Bosh prokuratura bergan ma‘lumotlariga ko‘ra, jurnalist tomog‘i og‘rigani sababli o‘zining yonida bo‘lgan Levofloksatsin (antibiotik) dorisidan bir dona ichgan, oradan 10-15 daqiqa o‘tib esa unda tutqanoq kuzatilgan va hushini yo‘qotgan. U keyinroq hushiga kelgan, 13-sentabr kuni soat 16:00 larda Yagafarovani takroran tutqanog‘i tutib, ko‘rsatilgan tibbiy muolajalarga qaramay soat 17:50 da biologik o‘lim holati qayd etilgan.
Sud-tibbiyot ekspertizasi ma’lumotlariga ko‘ra, jurnalistning o‘limi doridan allergik reaksiya. Bosh miya hamda o‘pka o‘tkir shishi, o‘tkir nafar olish va yurak-qon tomir yetishmovchiligi. Anafilaktik shok, tufayli yuzaga kelgan.
Holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.
Antibiotiklarni qo‘llash chog‘ida anafilaktik yoki allergik shok kuzatilganda nima qilish kerak? Mutaxassis tushuntirish berdi.
Statsionar sharoitda antibiotiklarni qo‘llash chog‘ida kuzatilishi mumkin bo‘lgan xavfli reaksiyalar yuz berganda bemorga qanday yordam berish kerakligi bo‘yicha Farmakologik nazorat bo‘limi yetakchi mutaxassisi Ravshan Abdullayev o‘z fiklarini bildirdi.
Mutaxassisning aytishicha, mobodo antibiotik dori vositasi qilinganidan keyin nojo‘ya taʼsir reaksiyasi rivojlansa birinchi navbatda eng xafli anafilaktik yoki allergik shok kuzatilishi mumkin.
“Anafilaktik yoki allergik shokni o‘z vaqtida, iloji boricha tez fursatda aniqlash lozim. Ko‘pincha buni faqat ixtisoslashgan mutaxassisgina qilishi mumkin.
Bunda mutaxassis nojo‘ya taʼsirning shokligini va darajasini aniqlaydi. Undan keyin shunga muvofiq yordam ko‘rsatadi. Birinchi shokka qarshi dori vositalari kerak bo‘ladi. Gohida ular ham yetarli bo‘lmay qolganda shokdan chiqarish uchun qo‘shimcha uskunalar lozim bo‘ladi. Masalan, kislarod maskasi. Tezda yurak muolajasini qilishga to‘g‘ri keladi. Agar yurak to‘xtab qolib, fibrilatsiya yuz bersa defibrillyator kerak bo‘ladi.
Yuqorida men sanab o‘tgan muolajalar faqatgina bemorning hayotini saqlab qolish uchungina amalga oshiriladigan ishlardir. Undan keyin, yaʼni bemor shok holatidan chiqarilganidan keyin to‘liq statsionar davolanishi lozim”, — dedi Ravshan Abdullayev.
Mutaxassis yuqoridagi muolajalarni uy sharoitida qilsa bo‘ladimi degan savolga javob berdi.
“Yo‘q, uy sharoitida qilib bo‘lmaydi. Shuning uchun bunday dori vositalarini faqat shifoxonada – ixtisoslashtirilgan xonasi va mutaxassisi bo‘lgan joylarda olish maqsadga muoviq”, — dedi u.
Izoh (0)