Bosh vazir Abdulla Aripov Toshkent shahrida Aziya Invest Favorit MCHJ tomonidan qurilayotgan ko‘p qavatli uy-joylardagi xonadonlarning fuqarolarga sotilishi yuzasidan kelib chiqqan nizoli vaziyat qatnashchilari bilan uchrashuv o‘tkazayotgani to‘g‘risida xabar berilgandi. “Daryo” muxbiriga ko‘ra, uchrashuvda Qurilish vazirligi mas’uli mazkur ko‘p qavatli uylar uchun qayerdan joy ajratilishini ma’lum qilgan.
Qurilish va uy-joy kommunal xo‘jaligi vaziri o‘rinbosari Davron Odilovga ko‘ra, Aziya Invest Favorit Yashnobod tumanida qurishni va’da qilgan ko‘p qavatli uylarni Toshkent shahar Bektemir tumanidagi Iyik ota massividan joy ajratish taklif etilmoqda. Mazkur hudud metrodan 3,6 kilometr uzoqlikda joylashgan.
Ajratilgan hududda qurilish ishlarini bajarish uchun uchta qurilish firmasi tanlab olingan. Ularga 1 metr kvadrat xonadon maydoni uchun 7 million, 6 million 900 ming va 6 millon 800 ming so‘mdan takliflar berilgan.
Bosh vazir Abdulla Aripovning qo‘shimcha qilishicha, narxlar yana pasaytiriladi.
“Xonadonlarni qurish muddati 2024-yilning oxirigacha tugatilishiga kafolat beramiz. Quruvchi tashkilotlar Respublikadagi eng yaxshi qurilish tashkilotlarining 10 taligiga kiradi. Qurilish ishlarini1-sentabrdan boshlash rejalashtirilmoqda”, — dedi bosh vazir.
Uchrashuvda murojaatchi fuqarolar komissiya tanlagan hudud shahardan ancha uzoqligini aytmoqda.
Bundan oldin Aziya Invest Favorit MCHJning 34 foiziga egalik qilgan Xayrulla Hatamovga nisbatan uy qamog‘i ehtiyot chorasi qo‘llanilgani to‘g‘risida xabar berilgandi. Unga va oila aʼzolariga tegishli bo‘lgan 200 milliard so‘mlik mulklari xatlangan.
Izoh (0)