Август ойи бошида бош вазир Абдулла Арипов Тошкентда уй сотиб олмоқчи бўлган мингдан ортиқ фуқароларни чув туширган Aziya Invest Favorit МЧЖ қурилиш фирмаси масаласи бўйича жабрланганлар билан учрашув ўтказганди.
Учрашувда бош вазир Абдулла Арипов қурилиш фирмасига алданиб қолган мингдан ортиқ фуқароларга Бектемир туманидаги “Ийк ота” массивидан уйлар қуриб берилишини айтган эди.
“Шаҳар қурилиш инвест”нинг “Дарё”га маълум қилишича, ҳукумат комиссияси топшириғига кўра айни вақтда уйларни қуриш ишлари бошлаб юборилган.
Айтилишича, массивда 11,4 гектар бўш ер майдони танлаб олинган. Биринчи босқичда ушбу ер майдонининг 4,4 гектарига умумий майдони 61 минг 766 кв метр бўлган 1104 хонадонли 16 та 9 ва 12 қаватли темир-бетон қуйма монолит типдаги уйлар қурилади.
Шунингдек, массив ҳудудида маҳаллий бюджетдан ажратилаётган 29 млрд сўм маблағ ҳисобидан 990 ўринли умумтаълим мактаби жорий йилда фойдаланишга топширилади. Бундан ташқари, ушбу массивда боғча ҳам қурилади.
Уйларни 2024 йил якунига қадар тўлиқ фойдаланишга топшириш режалаштирилган.
Қуриб битказилган уй-жойларни жабрланган фуқароларга тақсимлаш:
– аввалги пудрат ташкилоти билан тузилган шартномага асосан 100 фоиз пулини тўлаган (320 нафар) фуқароларга беғараз берилади;
– шартномага асосан белгиланган маблағни бир қисмини тўлаган фуқароларга ҳам уй берилади, лекин шартномадаги хонадон майдонининг тўланмаган қисмига ҳар бир кв метр майдон учун қўшимча тарзда тўлов қилишади;
– жабрланувчи фуқаролар томонидан аввалги пудрат ташкилоти билан тузилган инвестиция шартномасига асосан сотиб олинган хонадоннинг умумий квадрат метри ўзгарган тақдирда, унинг ошган қисми бўйича ҳар бир квадрат метрга қурилиш таннархида қўшимча тўлов амалга оширилади.
Пулини қайтариб олиш истагида бўлган фуқароларга тўлаган пул маблағлари тергов-суд жараёнлари якунлангандан кейин пудрат ташкилотининг давлат фойдасига тергов жараёнида хатланган мол-мулкларни сотиш эвазига тушган маблағлар ҳисобидан қайтариб берилади (тергов ва суд жараёнлари муайян вақт олиши мумкин).
163 миллиардлик фирибгарлик
Aziya Invest Favorit МЧЖ томонидан 1106 нафар фуқаро билан умумий майдони 61 минг 766 кв метр бўлган хонадонни сотиш бўйича шартномалар имзоланган ва фуқаролар томонидан 163,4 миллиард сўм нақд пул тўланган.
Бугунги кунга қадар 1 минг 106 нафар фуқародан 1 минг 60 нафари Бош прокуратуранинг тергов гуруҳи томонидан жабрланувчи сифатида сўроқ қилиниб, шартнома ва тўлов квитансияларининг ҳаққонийлиги ўрганилган.
Қолган 46 нафар фуқаро ҳали терговчиларга келиб учрашмаган (сўроқ қилинмаган). 1 минг 106 нафар фуқародан 321 таси шартномада кўрсатилган сумманинг 100 фоизини, 202 нафари 70 фоиздан юқори қисмини, 298 нафар фуқаро 50 фоиздан 70 фоизгача қисмини, 228 нафар фуқаро 30 фоиздан 50 фоизгача бўлган қисмини, 51 нафар фуқаро 30 фоизгача бўлган қисмини тўлаган. Шунингдек, 6 нафар фуқаро умуман пул тўламаган.
Ҳозирда тергов ҳаракатлари давом этмоқда.
Мавзуга доир:
- Тошкентда кредитга уй олиб беришни ваъда қилиб, фуқароларни 1,9 млрд сўм ва 18,1 минг долларга чув туширганлар аниқланди
- Тошкентда “новостройка” баҳонасида минглаб одамни алдаган МЧЖ раҳбарининг 200 млрд сўмлик мол-мулки хатланди
- Абдулла Арипов Тошкентда “новостройка”га пул тўлаб куйган мингдан ортиқ фуқаро билан учрашди
- Ҳукумат комиссияси “новостройка”га пул тўлаб куйган фуқаролар муаммосини ҳал этиш бўйича 2 та таклифни берди
- Aziya Invest Favorit чув туширган фуқароларга кўп қаватли уйларни қуриш учун Бектемирдан ер ажратиш таклиф этилди
Изоҳ (0)