Ayni vaqtda bosh vazir Abdulla Aripov Toshkent shahrida Aziya Invest Favorit MCHJ tomonidan qurilayotgan ko‘p qavatli uy-joylardagi xonadonlarning fuqarolarga sotilishi yuzasidan kelib chiqqan nizoli vaziyat qatnashchilari bilan uchrashuv o‘tkazmoqda. Bu haqda “Daryo” muxbiri xabar berdi.
Aziya Invest Favorit MCHJ bilan Toshkent shahri Yashnobod tumani Izzat ko‘chasida qurilishi rejalashtirilgan ko‘p qavatli uylardan kvartira sotib olish bo‘yicha shartnoma tuzgan mingdan ortiq fuqarolar oradan 1,5 yildan ko‘proq vaqt o‘tganiga qaramay qurilish ishlari hali boshlanmaganidan shikoyat qilishgandi.
Holat yuzasidan zudlik bilan Vazirlar Mahkamasining tegishli farmoyishi tashkil etilib, Izzat turarjoy majmuasidan uy sotib olmoqchi bo‘lib, aldanib qolgan fuqarolarning muammosini o‘rganish va ularni bartaraf etishga qaratilgan takliflar tayyorlash bo‘yicha Hukumat komissiyasi tuzilgan.
“Hozirgi kunda jinoyatlarning 20 foizdan ko‘pini qalloblik va firibgarlikni tashkil qilmoqda. Bu xalqimizning ishonuvchanligi va huquqiy savodi pastligini ko‘rsatmoqda. Bizni aksar odamlar shartnomani o‘qimasdan qo‘l qo‘yadi.
Bu kabi holatlar uy-joy qurish va uning savdosi yuzasidan qonunchilikni qayta ko‘rib chiqish bo‘yicha takliflar berdik. Mazkur holat respublikadagi eng katta ish. Bundan tashqari yana 4-5 ta holat bor”, — deydi Abdulla Aripov.
Aziya Invest Favorit MCHJ va fuqarolar o‘rtasida yuzaga kelgan muammoli masalalarni tezkor hal qilish va uy-joylar qurilishini to‘liq, sifatli va tezkor yakunlab foydalanishga topshirish maqsadida tuzilgan komissiyaga bosh vazir o‘rinbosari Ochilboy Ramatov rais etib belgilangan edi.
21-iyul kuni bosh vazir Abdulla Aripov Toshkent shahrida Aziya Invest Favorit va fuqarolar o‘rtasida kelib chiqqan nizoli vaziyat qatnashchilarini qabul qilgan va muammo hal etilishini aytgandi.
.jpg)
Ma’lumotlarga ko‘ra, ushbu MCHJ mansabdorlari tomonidan fuqarolarga yetkazilgan zarar 300 milliard so‘mdan oshadi. Holat yuzasidan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilgan.
Bosh vazir o‘rinbosari Ochilboy Ramatov boshchiligidagi Hukumat komissiyasi tomonidan Bosh prokuratura bilan hamkorlikda 2 ta holat bo‘yicha ham jabrlangan fuqarolarning muammolarini hal etish yuzasidan tayyorlagan takliflari o‘qib eshittirilmoqda.
Izoh (0)