Milliy gvardiya qo‘mondonining “Idoraviy harbiylashtirilgan qo‘riqlash bo‘linmalari shaxsiy tarkibining eng ko‘p sonini belgilash tartibi to‘g‘risidagi nizomni tasdiqlash haqida”gi buyrug‘i qabul qilindi, deb xabar beradi “Norma”.
Nizom idoraviy o‘ta muhim va toifalangan obyektlarni, shuningdek, maxsus yuklarni qo‘riqlashda xizmat o‘taydigan idoraviy harbiylashtirilgan qo‘riqlash bo‘linmalariga tatbiq etilmaydi.
Nizomga muvofiq, postlar obyektning quyidagi hududlarida tashkil etiladi:
- fuqarolar (transportlar) uchun mo‘ljallangan nazorat-o‘tkazish joylarida;
- obyekt hududining chegarasi (perimetri) bo‘ylab uning ichki yoki tashqi qismlarida yoxud unga yaqin hududlarda;
- obyektning alohida ahamiyatga ega bo‘lgan muayyan qismida.
Nazorat-o‘tkazish joylarida bitta post quyidagi asoslarga ko‘ra tashkil etiladi:
- o‘rtacha arifmetik hisob bo‘yicha bir soatda obyektning 400 tagacha xodimlari nazorat-o‘tkazish joyidan kirib-chiqqan taqdirda;
- o‘rtacha arifmetik hisob bo‘yicha bir soatda 20 tagacha transport vositalari nazorat-o‘tkazish joyidan kirib-chiqqan taqdirda.
Obyekt hududining chegarasi (perimetri) bo‘ylab uning ichki yoki tashqi qismlarida yoxud unga yaqin hududlarda har 500 metrgacha bo‘lgan masofada bitta post tashkil etiladi.
Obyektning alohida ahamiyatga ega bo‘lgan muayyan qismida, shuningdek obyektning ko‘rinishi cheklangan hududlarida (burilish va notekisliklar) bitta post yoki bitta patrullik yo‘nalishi tashkil etiladi.
Bunda, patrullik yo‘nalishi quyidagi masofalarda tashkil etiladi:
- kunduzi – 1000 metrgacha va kechasi – 500 metrgacha;
- qo‘riqlashning texnik vositalari bilan jihozlangan obyektlarda kunduzi – 2000 metrgacha va kechasi – 1000 metrgacha;
- Obyektni qo‘riqlashda bitta 24 soatlik post uchun 9 shtat birlik ajratiladi.
Shuningdek, quyidagi holatlarda mazkur lavozimlar shtatlar ro‘yxatiga kiritiladi:
- otryad boshlig‘i, uning o‘rinbosari, moddiy taʼminot bo‘yicha yordamchisi – shtat birliklari soni 76 birlikdan oshganda;
- alohida komanda va otryad tarkibidagi komanda boshlig‘i – ajratilgan shtat birliklari soni 16 birlikdan 75 birlikkacha bo‘lganda;
- qorovul itlari instruktori – har 7 birlik kinolog shtat lavozimiga;
- qorovul boshlig‘i;
- ajratilgan shtat birliklari 16 birlikdan oshganda keyinchalik har 25 birlik uchun;
- guruh boshlig‘i – ajratilgan shtat birliklari soni 6 birlikdan 15 birlikkacha bo‘lganda;
- ruxsatnomalar byurosi boshlig‘i – 3 birlik ruxsatnomalar byurosi navbatchisi bo‘lganda;
- kinolog – har bir qorovul iti uchun;
- nazoratchi va o‘qchi – qo‘riqlash vaqtidan kelib chiqqan holda.
Hujjat Qonun hujjatlari maʼlumotlari milliy bazasida eʼlon qilingan va 2023-yil 12-sentabrdan kuchga kirdi.
Milliy gvardiyaga berilayotgan vakolatlar
2021-yilning avgustida O‘zbekiston Milliy gvardiyasi xodimlariga fuqarolarning avtomobillaridan majburiy tarzda foydalanishga ruxsat berilgan edi. Milliy gvardiya organlari tomonidan transport vositasidan majburiy tarzda foydalanilganda, transport vositasining egasiga harbiy xizmatchi (xodim) o‘z identifikatsiyalovchi hujjatini berishi shart.
Shu yilning mayida esa prezident tomonidan imzolangan qonun bilan Maʼmuriy javobgarlik to‘g‘risidagi kodeksga o‘zgartirishlar kiritildi. Hujjat bilan Milliy gvardiya organlari xodimlariga mayda bezorilik, sovuq qurol yoki sovuq qurol sifatida foydalanilishi mumkin bo‘lgan ashyolarni olib yurish, voyaga yetmagan shaxsni maʼmuriy huquqbuzarlik sodir etishga, g‘ayriijtimoiy xatti-harakatlarga jalb qilish, jamoat joylarida alkogol mahsulotlarini isteʼmol qilish kabi maʼmuriy huquqbuzarliklar bo‘yicha ishlarni ko‘rib chiqish, bayonnomalar tuzish va ularni ko‘rib chiqish uchun sudga yuborish bo‘yicha qo‘shimcha vakolatlar berilgan.
Izoh (0)