Shavkat Mirziyoyev Samarqand viloyatiga tashrifi chog‘ida Oqdaryo tumanidagi 32-umumta’lim maktabida bo‘lib, sharoitlar bilan tanishdi.
Prezident matbuot xizmatining xabar qilishicha, ushbu maktab 2023-yilda kapital taʼmirlandi. U 782 o‘quvchiga mo‘ljallangan. 22 ta sinfxona, sport zali, oshxona, STEM laboratoriyasi, kompyuter xonalarida zamonaviy sharoitlar yaratilgan. Kutubxonada 1 ming 500 dan ziyod badiiy adabiyotlar jamlangan.
Maʼlumki, yoshlarni kamida ikkita chet tili va bitta zamonaviy hunarga o‘rgatish maktab taʼlimidagi asosiy yo‘nalish sifatida belgilangan. Maktabning bo‘sh turgan yer maydonida yengil konstruksiyalardan qo‘shimcha xonalar qurilib, 15 xil kasb-hunar uchun sharoit tashkil etilgan. Ularda o‘quvchilar kompyuter, texnik xizmat ko‘rsatish, to‘quvchilik, sartaroshlik, kosmetologiya, kulolchilik, o‘ymakorlikning ilk saboqlarini o‘rganadi.
Prezident ushbu xonalarni kirib ko‘rdi, yozgi to‘garakka kelgan bolalar bilan suhbatlashdi.
.jpg)
.jpg)
“Biz oliy taʼlimda qamrovni kengaytirib boryapmiz. Lekin hamma ham universitetda o‘qishni tanlamaydi. Shuning uchun farzandlarimizga maktabdayoq chet tillari va hunarlar o‘rgatishni maqsad qilganmiz. Kimning kichkina bo‘lsayam qo‘lida kasbi bo‘lsa, kuni o‘tadi. Keyin yana o‘z ustida ishlab, mahoratini oshirishi ham mumkin. Maqsadimiz — har bir yoshga munosib sharoit yaratish”, — dedi davlat rahbari.
Shavkat Mirziyoyev shu yerda o‘qituvchilar va mehnat faxriylari bilan muloqot qildi.
.jpg)
Izoh (0)