DJ Piligrim taxallusi bilan qo‘shiq ixlosmandlariga tanish Ilhom Yo‘lchiyev san’atga kirib kelganiga 25 yil bo‘ldi. U “Omon-omon” ko‘rsatuviga bergan intervyusida san’at tufayli kasallikka chalingani va uni yoga orqali davolagani haqida so‘zlab berdi.
— 2016-yil belim qattiq og‘rigan va egilolmay qolganman. Tekshirtirsam, umurtqada nerv tomirlarining qisilishi va kuchli shamollashi tashxisini qo‘yishgan. Uning paydo bo‘lishiga esa uzoq vaqt mashinada o‘tirish sabab ekan. Haqiqatan ham, gastrol safarlariga ketayotganda bir necha soat qimir etmay mashinada harakatlanamiz. Uning ustiga, ishim kompyuter bilan bog‘liq bo‘lgani ham salomatligimga salbiy ta’sir etibdi. Shundan keyin Hindistonga borib yashadim. U yerda yogani o‘rgandim. Hozir ham yoga mashg‘ulotlari bilan muntazam shug‘ullanaman. Agar kimdir shu kasallik bilan og‘riyotgan bo‘lsa, albatta, yoga bilan shug‘ullanishni tavsiya qilaman. Chunki salomatligim aynan yoga sabab yaxshilandi, — deydi xonanda.
Ilhom Yo‘lchiyev mutaxassisligi bo‘yicha nemis tili o‘qituvchisi ekanligi va onasining xohishi bilan institutda o‘qigani haqida so‘zlab berdi.
— Bolaligimda fazogir bo‘lishni orzu qilganman. Ammo onam nemis tili o‘qituvchisi bo‘lishimni istadi. Men institutga kirgan paytda besh yillik ta’lim va bakalavrga qo‘shib magistr darajasini ham berishardi. 1998-yili nemis tili o‘qituvchisi deb yozilgan diplomni olganman. Ammo bu sohada ishlashni istamadim. Chunki qiziqish bo‘lmagan, diplom esa haligacha onamning shkafida chiroyli idishlar qatorida turadi. U yerda mening diplomimdan tashqari yana ikkitasi bor. Sababini bilmayman-u, bizda bugungi kun bilan emas, kelajak bilan yashaladi. Bu diplom ham go‘yo kelajak uchun olib qo‘yilgandek. Foydalaniladimi-yo‘qmi, buni xudo biladi, — deydi xonanda Ilhom Yo‘lchiyev.
Xonanda noodatiy taxallusi bir kechada tasodifan xayoliga kelgani va bir muddat tungi klubda ishlagani haqida ham so‘zlab berdi.
— 1998-yili didjeylarning festivali bo‘lgan. Unda Best DJ so‘zlarining qisqartmasidan foydalanmoqchi edim. Ammo tashkilotchilarga bu yoqmadi. “Ertalabgacha vaqt bor, tongda afishalarni chop etishga yuborishimiz kerak. O‘zing uchun yaxshiroq nom top”, deyishgan. Xayol surib, kinoga ko‘zim tushib qolgan. Undagi dialogda piligrim so‘zi ishlatilgandi. Izlasam, bu so‘z darvesh ma’nosini anglatar ekan. Ana, taxallus topildi, deb DJ Piligrim bo‘lishni ma’qul ko‘rganman, — deydi xonanda.
Ilhom Yo‘lchiyev shu kungacha juda ko‘p xonandalar bilan duet kuylagan. Duetdoshlar orasida mashhurlari ham ko‘p. Xonanda ulardan “zina” sifatida foydalanganini yashirmadi.
— Menda prodyuser yoki homiy bo‘lmagan. Hamisha o‘z faoliyatimni o‘zim moliyalashtirganman. Mashhur xonandalar bilan duet kuylashimning asosiy sababi esa ularning mashhurligidan foydalanib ko‘tarilish bo‘lgan. Bu borada egoist ekanligimni tan olaman. Duetlarning deyarli hammasi yaxshi chiqqan va odamlarga yoqqan. Hozir o‘zim ham yosh xonandalarni qo‘llab-quvvatlashga harakat qilaman. Duet aytgan, hatto qo‘shiq yaratib bergan paytlarim ham ko‘p bo‘ladi. “Ko‘k choy” guruhi bilan ishladik, ularning qo‘shiqlari odamlarga yoqyapti, — deydi xonanda Ilhom Yo‘lchiyev.
Izoh (0)