DJ Пилигрим тахаллуси билан қўшиқ ихлосмандларига таниш Илҳом Йўлчиев санъатга кириб келганига 25 йил бўлди. У “Омон-омон” кўрсатувига берган интервьюсида санъат туфайли касалликка чалингани ва уни йога орқали даволагани ҳақида сўзлаб берди.
— 2016 йил белим қаттиқ оғриган ва эгилолмай қолганман. Текширтирсам, умуртқада нерв томирларининг қисилиши ва кучли шамоллаши ташхисини қўйишган. Унинг пайдо бўлишига эса узоқ вақт машинада ўтириш сабаб экан. Ҳақиқатан ҳам, гастрол сафарларига кетаётганда бир неча соат қимир этмай машинада ҳаракатланамиз. Унинг устига, ишим компьютер билан боғлиқ бўлгани ҳам саломатлигимга салбий таъсир этибди. Шундан кейин Ҳиндистонга бориб яшадим. У ерда йогани ўргандим. Ҳозир ҳам йога машғулотлари билан мунтазам шуғулланаман. Агар кимдир шу касаллик билан оғриётган бўлса, албатта, йога билан шуғулланишни тавсия қиламан. Чунки саломатлигим айнан ёга сабаб яхшиланди, — дейди хонанда.
Илҳом Йўлчиев мутахассислиги бўйича немис тили ўқитувчиси эканлиги ва онасининг хоҳиши билан институтда ўқигани ҳақида сўзлаб берди.
— Болалигимда фазогир бўлишни орзу қилганман. Аммо онам немис тили ўқитувчиси бўлишимни истади. Мен институтга кирган пайтда беш йиллик таълим ва бакалаврга қўшиб магистр даражасини ҳам беришарди. 1998 йили немис тили ўқитувчиси деб ёзилган дипломни олганман. Аммо бу соҳада ишлашни истамадим. Чунки қизиқиш бўлмаган, диплом эса ҳалигача онамнинг шкафида чиройли идишлар қаторида туради. У ерда менинг дипломимдан ташқари яна иккитаси бор. Сабабини билмайман-у, бизда бугунги кун билан эмас, келажак билан яшалади. Бу диплом ҳам гўё келажак учун олиб қўйилгандек. Фойдаланиладими-йўқми, буни худо билади, — дейди хонанда Илҳом Йўлчиев.
Хонанда ноодатий тахаллуси бир кечада тасодифан хаёлига келгани ва бир муддат тунги клубда ишлагани ҳақида ҳам сўзлаб берди.
— 1998 йили диджейларнинг фестивали бўлган. Унда Best DJ сўзларининг қисқартмасидан фойдаланмоқчи эдим. Аммо ташкилотчиларга бу ёқмади. “Эрталабгача вақт бор, тонгда афишаларни чоп этишга юборишимиз керак. Ўзинг учун яхшироқ ном топ”, дейишган. Хаёл суриб, кинога кўзим тушиб қолган. Ундаги диалогда piligrim сўзи ишлатилганди. Изласам, бу сўз дарвеш маъносини англатар экан. Ана, тахаллус топилди, деб DJ Пилигрим бўлишни маъқул кўрганман, — дейди хонанда.
Илҳом Йўлчиев шу кунгача жуда кўп хонандалар билан дуэт куйлаган. Дуэтдошлар орасида машҳурлари ҳам кўп. Хонанда улардан “зина” сифатида фойдаланганини яширмади.
— Менда продюсер ёки ҳомий бўлмаган. Ҳамиша ўз фаолиятимни ўзим молиялаштирганман. Машҳур хонандалар билан дуэт куйлашимнинг асосий сабаби эса уларнинг машҳурлигидан фойдаланиб кўтарилиш бўлган. Бу борада эгоист эканлигимни тан оламан. Дуэтларнинг деярли ҳаммаси яхши чиққан ва одамларга ёққан. Ҳозир ўзим ҳам ёш хонандаларни қўллаб-қувватлашга ҳаракат қиламан. Дуэт айтган, ҳатто қўшиқ яратиб берган пайтларим ҳам кўп бўлади. “Кўк чой” гуруҳи билан ишладик, уларнинг қўшиқлари одамларга ёқяпти, — дейди хонанда Илҳом Йўлчиев.
Изоҳ (0)