2022-yil dekabr oyida Olmaota shahrida bo‘lib o‘tgan tezkor shaxmat va blits bo‘yicha jahon chempionatida hijobsiz ishtirok etgan eronlik shaxmatchi Sara Xademga Ispaniyaning faxriy fuqaroligi berildi. Bu haqda 27-iyul kuni Reuters yozmoqda.
Sportchi musobaqada hijobsiz qatnashish orqali Eron hukumatiga qarshi kuzda bo‘lib o‘tgan norozilik namoyishlarini qo‘llab-quvvatlagan edi.
Eronda butun mamlakat bo‘ylab namoyishlar 2022-yil sentabr oyi o‘rtalarida 22 yoshli Mahsa Aminiyning o‘limi ortidan boshlangan. Qiz hijob o‘rash qoidalarini buzgani uchun axloq politsiya tomonidan qo‘lga olingan va mahkamada vafot etgan. Muxolifatchi faollarning so‘zlariga ko‘ra, politsiya Aminiyni kaltaklagan, biroq Eron rasmiylari qizda insult bo‘lganini da’vo qilmoqda.
26 yoshli Xadem Qozog‘istondagi musobaqa paytida hukumatga qarshi namoyishlarni qo‘llab-quvvatlaganidan afsuslanmasligini aytdi. Agar sportchi Eronda bo‘lganida jamoat joyiga hijobsiz chiqqani uchun hibsga olingan bo‘lardi.
Musobaqadan keyin Eron shaxmat federatsiyasi Xademdan yuz o‘girdi.
“Xadem chempionatga Eron federatsiyasi orqali emas, balki mustaqil, o‘z hisobidan bordi. U bizning mamlakatimizga vakillik qilmaydi”, — degan islom respublikasi shaxmat federatsiyasi rahbari Hasan Taminiy.
Eronda uch oylik namoyishlar natijasida ayollar uchun hisob qonuni yumashtildi, ammo rasmiy ravishda islom respublikasida majburiy hijob o‘rash haqidagi qonun haligacha bekor qilinmadi. Aksincha, 16-iyuldan boshlab Eron axloq politsiyasi qayta ish boshladi.
Izoh (0)