Eron bosh prokurori Muhammad Jafar Montazeri huquq-tartibot idoralari xodimlariga hijob o‘rash qoidalari buzilishiga qarshi kurashni kuchaytirishni buyurdi. Bu haqda Al-Arabia xabar berdi.
Politsiya tomonidan hijobning ommaviy yechilishi qat’iy bostirilishi kerak. Huquq-tartibot idoralari xodimlari hijobni noto‘g‘ri o‘raganlarni qo‘lga olib, ularni javobgarlikka tortishga majbur. Ayollarga islom jinoyat kodeksiga muvofiq jarimadan tashqari, o‘n kundan ikki oygacha qamoq jazosi ham belgilangan.
Bundan tashqari, ularga nisbatan qo‘shimcha ma’muriy choralar, xususan, davlat xizmatidan bo‘shatish, surgun qilish, mamlakatdan chiqib ketish va muxolifat tashkilotlari bilan aloqada bo‘lishni taqiqlash, mulkini musodara qilish kabilar qo‘llanilishi mumkin.
“Boshqalarni hijob o‘rashdan bosh tortishga ishontirgan va undaganlarni yanada og‘irroq jazo kutmoqda”, — deyiladi xabarda. Ular bir yildan 10 yilgacha qamoq jazosiga hukm qilinishi mumkin.
Eronda 2022-yil sentabr oyi oxirida 22 yoshli Mahsa Aminiy hijobni “noto‘g‘ri” o‘ragani uchun axloq politsiyasi tomonidan hibsga olinganidan keyin vafot etishi ortidan norozilik namoyishlari boshlangan. Tartibsizliklar chog‘ida xavfsizlik xodimlari tomonidan 450 dan ortiq odam o‘ldirilgan. Kamida 100 namoyishchi o‘limga hukm qilingan. Mamlakatda ikki o‘smir ham namoyishlar sababli o‘limga hukm qilinishi mumkin.
Izoh (0)