O‘tgan bir kun davomida Eron politsiyasi ayollarning hijob o‘rash majburiyatiga rioya qilinmagani uchun mamlakatdagi 137 ta do‘kon va 18 ta restoranni yopib qo‘ydi, deb xabar bermoqda Al-Arabiya telekanali.
Muassasalar yopilishi politsiyaning kuzatuv kameralari va yuzni tanish texnologiyasidan foydalangan holda qonunni buzgan ayollarga qarshi kurash rejasini amalga oshirishga kirishgani haqidagi bayonotidan bir kun o‘tib sodir bo‘ldi.
Bir hafta avval Eron politsiyasi boshlig‘i Ahmad-Reza Radan hijobsiz ayollar “aqlli” uskunalar yordamida aniqlanishi haqida ogohlantirgan edi. Bundan tashqari, agar yo‘lovchi ayollar kiyinish qoidalarini buzsa, avtomobil egalariga ogohlantirish SMS-xabarlari yuboriladi.
“So‘nggi 24 soat ichida politsiya tomonidan bir necha yuzlab qoidabuzarlik holatlari qayd etildi va avtomobil egalari SMS orqali xabardor qilindi”, — dedi politsiya vakili Said Montazerolmahdi.
Hukumat bu usul hijob qonuniga qarshi chiqishlarning oldini olishga yordam berishiga ishonmoqda. Eronda hijobga qarshi namoyishlarga 2022-yili hijob qoidalarini buzganlikda ayblanib hibsga olingan yosh kurd ayol Mahsa Aminiyning politsiya hibsxonasida o‘lgani sabab bo‘lgandi.
Aminiyning vafotidan keyin hibsga olinish xavfi borligiga qaramay, yirik shaharlarda ro‘molini yechgan ayollar soni ortgan. Politsiya yangi tizim “hijob qonunini buzuvchilarga hujjatlar va ogohlantirish xabarlarini” aniqlash va yuborish uchun “aqlli” kameralar va boshqa vositalardan foydalanishni o‘z ichiga olishini aytmoqda.
1979-yilgi inqilobdan keyin qabul qilingan qonunga ko‘ra, Eronda ayollar sochlarini yopishi va o‘z qomatini yashirish uchun uzun, keng kiyimlar kiyishi shart. Qoidabuzarlar jarimaga tortiladi yoki hibsga olinadi.
Izoh (0)