O‘zbekiston prezidentining 20-avgust kuni bo‘lib o‘tadigan tadbirkorlar bilan ochiq muloqotiga ariza va murojaatlarni qabul qilish boshlandi. Bu haqda Investitsiyalar, sanoat va savdo vazirligi matbuot xizmati xabar berdi.
Qayd etilishicha, tadbirda minglab ishbilarmonlarning onlayn va bevosita tarzda ishtirok etishi kutilmoqda. Muloqot tizimli muammolarni aniqlash, ularni hal qilish yo‘llarini topish va O‘zbekistonda tadbirkorlikni rivojlantirishni yanada rag‘batlantirishga yordam beradi.
Ochiq muloqotga tayyorgarlik ko‘rish doirasida Investitsiyalar, sanoat va savdo vazirligi tomonidan Savdo-sanoat palatasi va biznes-ombudsman bilan hamkorlikda tadbirkorlar uchun Call-markazlari va tahliliy shtab faoliyati tashkil etildi.
Bu jarayonga mas’ul vazirlik va idoralar jalb etilib, viloyatlarda hududiy shtablar tashkil qilindi.
Murojaatlarni 1094 va 1100 raqamlari yoki yozma ravishda business.gov.uz portali orqali haftasiga yetti kun, 24 soat davomida yo‘llash mumkin. Kelib tushgan har bir murojaatlar inobatga olinadi.
Vazirlik xabarida keltirilishicha, bu formatdagi muloqot anʼanasi ikki yildan buyon davom etib kelayotganiga qaramasdan 2021-yildan boshlab tadbirlarga tayyorgarlik doirasida ishbilarmonlik muhitini yaxshilash bo‘yicha 27 mingdan ortiq murojaat va takliflar kelib tushdi. Ochiq va konstruktiv takliflar yangi islohotlar dasturini shakllantirishga imkon berdi. Bu yil uchinchi ochiq muloqot bo‘lib o‘tadi.
Tadbirkorlar kuni
Shavkat Mirziyoyev 2021-yildan boshlab 20-avgustni Tadbirkorlar kuni etib belgilagan va uni har yili keng nishonlashni taklif qilgan. O‘sha yili prezidentning tadbirkorlar bilan o′tkazgan ilk ochiq muloqotida o‘n mingga yaqin tadbirkor ishtirok etgandi. 2022-yilda prezident qarori bilan “Faol tadbirkor” ko‘krak nishoni ta’sis etildi va o‘sha yili 71 nafar tadbirkorga ushbu ko‘krak nishoni topshirildi.
Izoh (0)